कोंढव्यात पती-पत्नीचा राहत्या घरी मृत्यू; कारण अद्याप अस्पष्ट

प्रतिनिधी

पुण्यातील कोंढवा येथील श्रद्धानगर परिसरात एका ५२ वर्षीय व्यक्ती आणि त्याच्या ४८ वर्षीय पत्नीचा त्यांच्या राहत्या घरी मृत्यू झाला आहे. शुक्रवारी सकाळी त्यांचा २३ वर्षांचा मुलगा कामावरून घरी परतला, तेव्हा ही माहिती समोर आली.

रात्रपाळी संपवून घरी आलेल्या मुलाने बराच वेळ दरवाजा वाजवूनही प्रतिसाद न मिळाल्याने शेजाऱ्यांच्या मदतीने दरवाजा तोडला. घरामध्ये त्याचे आई-वडील बेशुद्ध अवस्थेत आढळले, त्यानंतर त्यांना तातडीने दवाखान्यात नेले असता डॉक्टरांनी त्यांना मृत घोषित केले.

प्रकाश मुंडे आणि ज्ञानेश्वरी मुंडे अशी या मृत दांपत्याची नावे असून प्रकाश मुंडे हे चालक म्हणून काम करत होते. पोलिसांनी दिलेल्या माहितीनुसार, ज्ञानेश्वरी मुंडे या मागील एक वर्षापासून ब्रेन ट्यूमर या गंभीर आजाराने त्रस्त होत्या. या आजारपणामुळे मृत्यू झाला का? की इतर काही कारण आहे. याचा तपास सध्या पोलीस करत आहेत. सध्या तरी येवलेवाडी पोलिसांनी या प्रकरणी अकस्मात मृत्यूची नोंद केली आहे.

घटनेची माहिती मिळताच वरिष्ठ पोलीस निरीक्षक अमर काळंगे यांनी पथकासह घटनास्थळाची पाहणी केली. दोघांचा मृत्यू नेमका कशामुळे झाला याचा शोध सध्या सुरु आहे. एकाच वेळी पती आणि पत्नीचा मृत्यू झाल्याने परिसरात हळहळ व्यक्त केली जात आहे. पोलीस या प्रकरणात घरातील इतर सदस्यांचे जबाब नोंदवून घेत आहेत.