प्रतिनिधी
अनैतिक संबंधाच्या संशयावरुन एकावर कुऱ्हाडीने वार करण्यात आल्याची घटना येरवडा भागात घडली. याप्रकरणी एकाविरुद्ध गुन्हा दाखल करण्यात आला. रितेश लक्ष्मण परदेशी (वय ४८, रा. जयजवाननगर, येरवडा) असे जखमी झालेल्याचे नाव आहे. परदेशी याच्या खुनाचा प्रयत्न केल्याप्रकरणी उमेश रमेश वाघमारे (वय ३८, रा. बालाजीनगर, धनकवडी) याच्याविरुद्ध गुन्हा दाखल करण्यात आला आहे.
आराेपी वाघमारे पसार झाला आहे. परदेशी यांनी याबाबत येरवडा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, परदेशी आणि वाघमारे ओळखीचे आहेत. परदेशी ठेकेदार आहेत. नात्यातील एका महिलेशी परदेशी यांच्याशी अनैतिक संबंध असल्याचा संशय आरोपी वाघमारेला होता. सोमवारी सकाळी अकराच्या सुमारास दुचाकीस्वार परदेशी हे येरवड्यातील जयजवाननगर परिसरातून निघाले होते.
त्यावेळी आरोपी वाघमारे तेथे आला. त्याने कुऱ्हाड लपविली होती. परदेशी यांना त्याने थांबविले. नात्यातील महिलेशी अनैतिक संबंध असल्याचा आरोप करुन त्याने परदेशी यांच्यावर कुऱ्हाडीने हल्ला केला. प्रसंगावधान राखून त्यांनी कुऱ्हाडीचे वार हातावर झेलले. परदेशी यांच्या दोन्ही हातांना जखम झाली. दुचाकीवरुन तेे तोल जाऊन पडले. त्यानंतर आरोपीने त्यांच्यावर कुऱ्हाडीने वार केले. हल्ल्यात गंभीर जखमी झालेल्या परदेशी यांना या भागातील नागरिकांनी तातडीने रुग्णालयात दाखल केले. आरोपी वाघमारे तेथून पसार झाला. वरिष्ठ पोलीस निरीक्षक रवींद्र शेळके यांनी घटनास्थळी भेट दिली. पोलीस उपनिरीक्षक शिंदे तपास करत आहेत.
