प्रतिनिधी

वडगाव निंबाळकर (ता. बारामती) येथील वडगाव निंबाळकर पोलीस स्टेशनच्या वतीने पत्रकार दिनाचे औचित्य साधून सर्व पत्रकार बांधवांचा मोठ्या उत्साहात सन्मान करण्यात आला. सामाजिक बांधिलकी जपत पत्रकारांनी केलेल्या कार्याचा गौरव म्हणून हा कार्यक्रम आयोजित करण्यात आला होता.

या कार्यक्रमास पोलीस निरीक्षक नागनाथ पाटील वडगाव निंबाळकर यांच्या अध्यक्षतेखाली प्रसन्न व उत्साही वातावरणात आयोजन करण्यात आले. कार्यक्रमाचे सूत्रसंचालन राहुल साबळे पोलीस उपनिरीक्षक वडगाव निंबाळकर यांनी केले. यावेळी विविध दैनिक, इलेक्ट्रॉनिक व डिजिटल माध्यमांतील पत्रकार मोठ्या संख्येने उपस्थित होते.

पोलीस-पत्रकार यांच्यातील समन्वय अधिक दृढ व्हावा, समाजापर्यंत अचूक व सकारात्मक माहिती पोहोचावी, यासाठी पत्रकारांचे योगदान अत्यंत महत्त्वाचे असल्याचे मत यावेळी व्यक्त करण्यात आले. यावेळी सर्व पत्रकार बांधवांच्या वतीने पत्रकार श्री गणेश आळंदीकर यांनी प्रशासनाचे आभार व्यक्त केले.

कार्यक्रमाच्या शेवटी उपस्थित प्रत्येक पत्रकारास पुस्तक भेट देऊन शुभेच्छा देण्यात आल्या, तसेच शाल, पुष्पगुच्छ  देऊन गौरव करण्यात आला. या उपक्रमामुळे पोलीस व पत्रकार यांच्यातील नाते अधिक बळकट झाल्याची भावना उपस्थितांनी व्यक्त केली.