प्रतिनिधी
एमबीबीएस अभ्यासक्रमास प्रवेश मिळवून देण्याचे आमिष दाखवत राज्यातील अनेक विद्यार्थी आणि पालकांची फसवणूक करणाऱ्या तेलंगणातील एकाला येरवडा पोलिसांनी अटक केली. आरोपीने आतापर्यंत ४० विद्यार्थ्यांची लाखो रुपयांची फसवणूक केल्याचे उघडकीस आले आहे.
आरोपीविरोधात यापूर्वी हैदराबाद आणि मुंबईत फसवणुकीचे सहा गुन्हे दाखल आहेत. अरविंद प्रकाशकुमार आरोगोंडा (वय ४७, रा. सिकंदराबाद, तेलंगणा) असे अटक करण्यात आलेल्याचे नाव आहे.
वैद्यकीय अभ्यासक्रमास प्रवेश मिळवून देण्याचे आमिष दाखवून एका पालकाची आरोपी अरविंद आरोगोंडा याने आठ लाख १२ हजार रुपयांची फसवणूक केली होती. या प्रकरणी १८ मार्च रोजी येरवडा पोलिस ठाण्यात गुन्हा दाखल करण्यात आला होता. दरम्यान, आरोपीला मुंबई पोलिसांनी फसवणुकीच्या एका गुन्ह्यात अटक केली होती. त्याला ऑर्थर रोड कारागृहात न्यायालयीन कोठडीत ठेवण्यात आले होते. पुण्यातील येरवडा परिसरातील एकाची फसवणूक केल्याची माहिती तपासात मिळाली. त्यानंतर न्यायालयाच्या आदेशाने त्याला येरवडा पोलिसांनी तपासासाठी ऑर्थर रोड कारागृहातून ताब्यात घेतले. अपर पोलिस आयुक्त मनोज पाटील, पोलिस उपायुक्त रजनीकांत चिलुमुला यांच्या मार्गदर्शनाखाली पोलिस पथकाने ही कामगिरी केली.
आरोपी आणि त्याच्या साथीदाराने एडव्हिओ लर्निंग सोल्यूशन्स प्रा. लि. नावाची कंपनी हैदराबादमध्ये सुरू केली होती. या कंपनीच्या पुण्यासह मुंबईत शाखा सुरू केल्या होत्या. विद्यार्थ्यांना वैद्यकीय अभ्यासक्रमास प्रवेश मिळवून देण्याची जाहिरात त्याने सोशल मीडियावर व्हायरल केली होती. शासकीय वैद्यकीय महाविद्यालयातील प्रवेश मार्गदर्शनासाठी पाच लाख रुपये, खासगी महाविद्यालयात प्रवेशासाठी तीन लाख रुपये असे शुल्क तो आकारत होता. वैद्यकीय अभ्यासक्रमास प्रवेश न मिळाल्यास पैसे परत करू, असे आमिष त्याने दाखवले होते.
