M NEWS MARATHI

प्रतिनिधी

पुणे : विश्रांतवाडी परिसरातील भीमनगर येथे दुचाकी पार्किंगच्या किरकोळ कारणावरून वाद घालत लोखंडी कोयत्याचा धाक दाखवून दहशत निर्माण करणाऱ्या तीन अल्पवयीन मुलांना गुन्हे शाखा, युनिट-४च्या पथकाने तातडीने ताब्यात घेतले.

सोमवारी (५ ऑक्टोबर) रात्री सुमारे १० वाजण्याच्या सुमारास गुन्हे शाखा युनिट-४चे पथक विश्रांतवाडी परिसरात पेट्रोलिंग करीत होते. त्यावेळी पोलिस हवालदार साबळे व दुसिंग यांना गोपनीय बातमीदारामार्फत भीमनगर परिसरात काही मुलांनी दुचाकी पार्किंगच्या वादातून कोयत्याचा धाक दाखवून दहशत निर्माण केल्याची माहिती मिळाली.

माहिती मिळताच पोलिस पथकाने घटनास्थळी धाव घेतली. पोलिस हवालदार साबळे यांनी एका अल्पवयीन मुलाला कोयत्यासह ताब्यात घेतले. त्यानंतर सहायक पोलिस फौजदार हरीश मोरे, पोलिस हवालदार दुसिंग, आव्हाड आणि खराडे यांच्या मदतीने सापळा रचून पळून गेलेल्या अन्य दोन मुलांनाही ताब्यात घेण्यात आले.

तिन्ही मुले अल्पवयीन असल्याने त्यांच्यावर बाल न्याय (बालकांची काळजी व संरक्षण) अधिनियम, २०१५ मधील तरतुदींनुसार पुढील कायदेशीर प्रक्रिया सुरू करण्यात आली आहे. त्यांना पुढील कार्यवाहीसाठी विश्रांतवाडी पोलिसांच्या ताब्यात देण्यात आले असून, याप्रकरणी गुन्हा नोंद करण्याची प्रक्रिया सुरू आहे.

या प्रकरणाचा पुढील तपास विश्रांतवाडी पोलिस करीत आहेत.

प्रतिनिधी

 वडगाव निंबाळकर पोलीस स्टेशन हद्दीत झालेल्या मोटारसायकल चोरीचा गुन्हा वडगाव निंबाळकर पोलिसांनी उघडकीस आणला असून, याप्रकरणी दोन आरोपींना अटक करण्यात आली आहे. आरोपींकडून मोटारसायकल जप्त करण्यात आली आहे.

           याबाबत वडगाव निंबाळकर पोलीस स्टेशन येथे गु.र.नं. 209/2026, भारतीय न्याय संहिता कलम 303(2) अन्वये गुन्हा दाखल करण्यात आला आहे. दिनांक 30 सप्टेंबर 2026 रोजी सायंकाळी 7.30 ते रात्री 11.30 वाजण्याच्या दरम्यान, वडगाव निंबाळकर येथील श्रवण रेस्टॉरंट अँड परमिट रूम बिअर बारसमोरील पार्किंगमध्ये फिर्यादी अभिजित चंद्रकांत घोडके, रा. वडगाव निंबाळकर यांनी त्यांची काळ्या रंगाची हिरो स्प्लेंडर प्लस मोटारसायकल क्र. MH-42-AC-7749, हँडल लॉक करून पार्क केली होती. अज्ञात इसमाने सदर मोटारसायकलचे हँडल लॉक तोडून ती चोरी करून नेली होती.

        सदर गुन्ह्याचा तपास करत असताना पोलिसांनी तपासाच्या आधारे अजिंक्य जितेंद्र मोरे (वय 20, रा. जिंती, ता. फलटण, जि. सातारा) व अक्षय जनार्दन कांबळे (वय 31, रा. जिंती, ता. फलटण, जि. सातारा) यांना ताब्यात घेतले. तपासादरम्यान आरोपींकडून गुन्ह्यात गेलेली स्प्लेंडर प्लस मोटरसायकल नंबर MH42AC7749 व गुन्ह्यात वापरलेली TVS Star सिटी मोटारसायकल क्र. MH-11-AQ-6593 असा मुद्देमाल जप्त करण्यात आला आहे.

      सदर कारवाई सपोनी जीवन मोहिते यांच्या मार्गदर्शनाखाली पोलीस हवालदार खांडेकर/2088, पोलीस शिपाई आबा जाधव व पोलीस शिपाई नरेंद्र यादव यांनी केली आहे. गुन्ह्याचा पुढील तपास सुरू आहे.

      वाहन चोरीच्या घटना रोखण्यासाठी नागरिकांनी आपली वाहने सुरक्षित ठिकाणी पार्क करावीत तसेच वाहनाला हँडल लॉकसोबत अतिरिक्त सुरक्षा साधनांचा वापर करावा, असे आवाहन वडगाव निंबाळकर पोलिसांच्या वतीने करण्यात आले आहे.

प्रतिनिधी

 सोमेश्वर नगर– रविवार दिनांक 4/10/2026 रोजीअण्णासाहेब आवटे महाविद्यालय मंचर येथे झालेल्या सावित्रीबाई फुले पुणे विद्यापीठ अंतर्गत पुणे जिल्हा अंतर महाविद्यालय क्रॉस कंट्री स्पर्धेमध्ये सोमेश्वर नगर येथील मु सा काकडे महाविद्यालयाने सांघिक विजेतेपद मिळवले

विजय संघातील खेळाडू पुढील प्रमाणे सार्थक मोरे ,मयूर येळे, नवनाथ बरकडे कुणाल जाधव ,आदित्य मदने, जगन्नाथ गडदरे या खेळाडूंनी जिल्हास्तरीय क्रॉस कंट्री स्पर्धेमध्ये महाविद्यालयाला सांघिक विजेतेपद मिळवून दिले मयूर येळे आणि कुणाल जाधव या खेळाडूंची नाशिक येथे होणाऱ्या विभागीय स्पर्धेसाठी निवड झाली

विजयी खेळाडूंना प्रा. डॉ. बाळासाहेब मरगजे व प्रा दत्तराज जगताप यांचे मार्गदर्शन लाभले आणि संघ व्यवस्थापक म्हणून प्रा.गोरख काळे यांनी काम पाहिले. महाविद्यालयाचे प्राचार्य डॉ. देविदास वायदंडे यांनी विजयी खेळाडूंचे अभिनंदन केले व विभागीय स्पर्धेसाठी खेळाडूंना शुभेच्छा दिल्या तसेच खेळाडूंना प्राचार्य कक्षामध्ये बोलावून त्यांचे अभिनंदन करून पुढील स्पर्धेसाठी त्यांना जास्तीत जास्त सुविधा महाविद्यालयातर्फे उपलब्ध करून देण्याचे आश्वासन दिले

संस्थेचे अध्यक्ष मा. सतीशराव काकडे- देशमुख महाविद्यालय विकास समितीचे अध्यक्ष मा. अभिजीत भैय्या काकडे- देशमुख सचिव श्री सतीश लकडे यांनी देखील विजय खेळाडूंचे अभिनंदन करून त्यांना पुढील स्पर्धेसाठी शुभेच्छा दिल्या

प्रतिनिधी

            सदगुरू माता सुदीक्षा जी महाराज यांच्या असीम कृपाशीर्वादाने संत निरंकारी चॅरिटेबल फाउंडेशन अंतर्गत संचालित निरंकारी इन्स्टिट्यूट ऑफ म्युझिक अँड आर्ट यांच्या वतीने ‘स्वरभक्ती – एक सुरेल भक्ती संध्या’ या विशेष संगीतमय कार्यक्रमाचे आयोजन शनिवार, ३ ऑक्टोबर रोजी सायंकाळी ५ ते ८ या वेळेत संत निरंकारी सत्संग भवन, दिघी रोड, भोसरी येथे उत्साहात करण्यात आले.

            सन २०१५ मध्ये बाबा हरदेव सिंह जी महाराज यांच्या संकल्पनेतून साकार झालेल्या निरंकारी इन्स्टिट्यूट ऑफ म्युझिक अँड आर्टच्या देशभरात २५ शाखा कार्यरत आहेत. पिंपरी-चिंचवड मधील रूपीनगर शाखेत गेल्या एक वर्षापासून संस्थेच्या संगीत प्रशिक्षणाच्या उपक्रमांना सुरुवात झाली असून, अनेक विद्यार्थी नियमितपणे संगीताचे प्रशिक्षण घेत आहेत. संगीताच्या माध्यमातून विद्यार्थ्यांच्या कलागुणांना वाव मिळण्यासोबतच त्यांच्यामध्ये शिस्त, एकाग्रता आणि भारतीय संगीत परंपरेविषयी आवड निर्माण होत आहे.

            ‘स्वरभक्ती’ या भक्ती संध्येत विद्यार्थ्यांसह विविध कलाकारांनी गायन आणि वाद्यवृंदाच्या माध्यमातून सुरेल सादरीकरण केले. मधुर स्वर आणि वाद्यांच्या सुरांनी संपूर्ण वातावरण भक्तिमय झाले. संगीताच्या माध्यमातून भक्ती, प्रेम, शांती आणि मानवी मूल्यांचा संदेश उपस्थितांपर्यंत पोहोचवण्यात आला.

            यावेळी संगीताच्या परीक्षा यशस्वीरीत्या उत्तीर्ण झालेल्या विद्यार्थ्यांचा मान्यवरांच्या हस्ते सन्मानचिन्ह व प्रमाणपत्र देऊन सत्कार करण्यात आला. विद्यार्थ्यांच्या या यशाबद्दल उपस्थित श्रद्धाळू, संगीतप्रेमी आणि पालकांनी त्यांचे कौतुक करून त्यांचा उत्साह वाढविला.

            कार्यक्रमाला निरंकारी इन्स्टिट्यूट ऑफ म्युझिक अँड आर्ट, दिल्लीचे प्राचार्य डॉ. विनोद गंधर्व जी यांची प्रमुख उपस्थिती लाभली. संगीत आणि कलेच्या माध्यमातून विद्यार्थ्यांच्या प्रतिभेला योग्य दिशा देऊन त्यांना व्यासपीठ उपलब्ध करून देण्याच्या संस्थेच्या प्रयत्नांचे त्यांनी कौतुक केले.

            संगीत आणि कलेच्या माध्यमातून आध्यात्मिक चेतना, प्रेम, शांती, सद्भावना आणि मानवी मूल्यांचा प्रसार करणे, हा या कार्यक्रमाचा प्रमुख उद्देश होता. उपस्थित श्रद्धाळू आणि संगीतप्रेमींनी ‘स्वरसंध्या’ या विशेष संगीतमय सादरीकरणाचा आनंद घेत विद्यार्थ्यांना मनापासून प्रोत्साहन दिले.

कार्यक्रमाच्या यशस्वी आयोजनासाठी विविध सेवांमध्ये योगदान देणाऱ्या सर्वांचे कौतुक करण्यात आले. कार्यक्रमाच्या समारोपप्रसंगी पुणे झोनचे झोनल इंचार्ज अशोक आहुजा यांनी उपस्थित मान्यवर, कलाकार, विद्यार्थी, पालक तसेच कार्यक्रमासाठी सहकार्य करणाऱ्या सर्वांचे आभार व्यक्त केले.

प्रतिनिधी

कोळगाव ता निफाड येथील विंचूर ते कोळगाव रस्ता हा शिर्डी कडे जाणारा मधला व सुखरूप मार्ग म्हणून ओळखला जातो हा रस्ता झाल्याने शिर्डी कडे जाणारे भाविक व गुजरात कडील पाई जाणाऱ्या दिंड्या ह्या मार्गाने जात आहे हा रस्ता पि डब्लु डी कडे वर्ग आहे हृया रस्त्यालगत प्रत्येक वळणावर व सगळ्या शाळा या ठिकाणी फलक लावण्यात आले परंतु कोळगाव माळचारी येथील जिल्हा परिषद वस्ती शाळा यांची जणू दप्तरी नोंद झालीच नाही असे दिसते येथे कोणत्याही प्रकारचा फलक नाही व लावण्यात ही आला नाही सदर शाळेच्या आवारात सध्या बालवाडी देखील सुरू आहे ह्या लहान मुलांचा प्रश्न ऐरणीवर आलाय शाळा सुटल्यावर हे विद्यार्थी अचानक रस्त्यावर येऊन काही अनुचित प्रकार घडू नये कारण फलक नसल्याने वाहन चालकांना येथे शाळा आहे हे समजणार कसे तरी प्रशासनाने आपलीं तत्परता दाखवली पाहिजे व होणाऱ्या संभाव्य परिणामाला ओळखून फलक लावावा अशी मागणी पालक आणि रहीवाशी करत आहेत

प्रतिनिधी

बारामती तालुक्यातील माळेगाव पोलीस ठाण्याच्या हद्दीत सार्वजनिक सुव्यवस्थेस बाधक ठरणाऱ्या व धोकादायक कृत्यांमध्ये सहभागी असलेल्या निशांत ऊर्फ भैया आप्पाजी मदने (वय २४, रा. कऱ्हावागज, ता. बारामती, जि. पुणे) याच्यावर महाराष्ट्र झोपडपट्टीगुंड, हातभट्टीवाले, औषधीद्रव्यविषयक गुन्हेगार, धोकादायक व्यक्ती इत्यादींच्या विघातक कृत्यांना आळा घालण्याबाबतच्या कायद्यान्वये (एमपीडीए) स्थानबद्धतेची कारवाई करण्यात आली आहे.

पुणे ग्रामीणचे पोलीस अधीक्षक संदीप सिंह गिल्ल यांनी जिल्ह्यातील सराईत व धोकादायक गुन्हेगारांविरोधात प्रतिबंधात्मक कारवाई करण्याच्या सूचना पोलीस ठाण्यांच्या प्रभारी अधिकाऱ्यांना दिल्या होत्या. त्यानुसार माळेगाव पोलीस ठाण्याच्या हद्दीतील निशांत मदने याच्याविरुद्ध यापूर्वी २०२३, २०२४ आणि २०२६ या कालावधीत गंभीर स्वरूपाचे गुन्हे दाखल असल्याचे पोलीस प्रसिद्धीपत्रकात नमूद करण्यात आले आहे.

त्याच्याविरुद्ध विनयभंग, इतरांच्या जीवितास किंवा वैयक्तिक सुरक्षेस धोका निर्माण करणारी कृत्ये, जबर दुखापतीची भीती दाखवून बलपूर्वक नुकसान करणे, घातक हत्यारांनी दुखापत करणे तसेच खुनाचा प्रयत्न यांसारख्या गंभीर स्वरूपाच्या गुन्ह्यांचा समावेश असल्याचे पोलिसांनी सांगितले.

या पार्श्वभूमीवर माळेगाव पोलीस ठाण्याचे सहायक पोलीस निरीक्षक कुलदीप संकपाळ यांनी एमपीडीए अंतर्गत कारवाईचा प्रस्ताव पुणे ग्रामीण पोलीस अधीक्षकांकडे सादर केला. प्रस्तावाचे अवलोकन केल्यानंतर तो पुढील कार्यवाहीसाठी पुणे जिल्हाधिकारी तथा जिल्हादंडाधिकारी जितेंद्र डुडी यांच्याकडे पाठविण्यात आला.

जिल्हाधिकारी जितेंद्र डुडी यांनी ३० सप्टेंबर २०२६ रोजीच्या आदेशान्वये निशांत मदने याला स्थानबद्ध करण्याचे आदेश दिले. या आदेशानुसार माळेगाव पोलिसांनी पथके तयार करून शोध घेतला आणि १ ऑक्टोबर २०२६ रोजी त्याला ताब्यात घेऊन अकोला येथील मध्यवर्ती कारागृहात दाखल केले.

ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, बारामती विभागाचे उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक प्रमोद क्षीरसागर, माळेगाव पोलीस ठाण्याचे सहायक पोलीस निरीक्षक कुलदीप संकपाळ, पोलीस उपनिरीक्षक देवीदास साळवे तसेच पोलीस अधिकारी व अंमलदारांच्या पथकाने ही कारवाई केली.

प्रतिनिधी

सोमेश्वर सहकारी साखर कारखान्याच्या पंचवार्षिक निवडणुकीमध्ये दिवसागणिक नवनवीन ट्विस्ट समोर येत आहेत. उमेदवारी अर्ज माघारी घेण्याचा आजचा शेवटचा दिवस नाट्यमय घडामोडींचा ठरला. कारखान्याचे विद्यमान चेअरमन यांनी अचानक स्वतःच्या स्वतंत्र पॅनेलची घोषणा केल्याने, त्यांनी अजित पवारांच्या विचारांना थेट तिलांजली वाहिल्याची चर्चा आता सभासदांमध्ये जोरदार रंगू लागली आहे.

​अजित पवारांचे अत्यंत विश्वासू सहकारी म्हणून विद्यमान चेअरमन पुरुषोत्तम जगताप यांच्याकडे पाहिले जायचे. अजित पवारांनीही त्यांच्यावर निष्ठा दाखवत तब्बल १३ वर्षांपेक्षा जास्त काळ सोमेश्वरच्या चेअरमनपदाची धुरा त्यांच्याकडेच सोपवली होती. मात्र, ऐन निवडणुकीच्या तोंडावर जगताप यांनी वानेवाडी येथे कार्यकर्त्यांचा मेळावा घेत स्वतंत्र निवडणूक लढवण्याची घोषणा केल्याने सोमेश्वरच्या राजकीय वर्तुळात एकच खळबळ उडाली आहे.

चेअरमन यांच्या या अनपेक्षित निर्णयामुळे सोमेश्वरची निवडणूक आता थेट तिरंगी लढतीकडे झुकण्याची दाट शक्यता निर्माण झाली आहे. एकीकडे सत्ताधारी राष्ट्रवादी, दुसरीकडे विरोधक आणि आता चेअरमन यांचे स्वतंत्र पॅनेल, अशा या तिहेरी सामन्यामुळे निवडणुकीतील चुरस प्रचंड वाढली आहे.

ऐनवेळी झालेल्या या बंडखोरीनंतर आता राष्ट्रवादी काँग्रेस (अजित पवार गट) या निवडणुकीत नेमकी काय रणनीती आखणार? बिघडलेली समीकरणे सावरण्यासाठी काय पावले उचलली जाणार? याकडेच आता संपूर्ण सभासदांचे लक्ष लागून राहिले आहे.

​सोमेश्वरची ही बहुचर्चित मतदान प्रक्रिया ११ ऑक्टोबरला पार पडणार असून १२ ऑक्टोबर रोजी निकाल जाहीर होणार आहेत. या रणसंग्रामात सभासदांचा कौल नेमका कुणाच्या पारड्यात पडणार, हे पाहणे महत्त्वाचे ठरेल.

प्रतिनिधी

ज्युबिलंट इंग्रेव्हिया लिमिटेडअंतर्गत कार्यरत असलेल्या ‘ज्युबिलंट भरतीया फाउंडेशन’च्या वतीने नीरा-निंबूत परिसरात विविध सामाजिक उपक्रम राबवून समाजसेवेची बांधिलकी जपली जात आहे.

​ज्युबिलंट भरतीया समूहाद्वारे २००७ मध्ये ‘ना नफा ना तोटा’ या तत्त्वावर या फाउंडेशनची स्थापना करण्यात आली. सर्व घटकांना सोबत घेऊन धोरणात्मक भागीदारीद्वारे समाजात प्रगतीशील बदल घडवून आणणे, हे फाउंडेशनचे मुख्य ध्येय आहे. संस्थेमार्फत प्रामुख्याने पर्यावरण, शिक्षण, आरोग्यसेवा आणि महिला सक्षमीकरण या चार महत्त्वाच्या घटकांवर विशेष भर दिला जात आहे.

​नीरा व निंबूत परिसराच्या सर्वांगीण विकासासाठी फाउंडेशनतर्फे खालील महत्त्वाचे उपक्रम राबवण्यात येत आहेत:

आरोग्य सुविधा: निंबूत परिसरात ‘फिरत्या दवाखान्या’द्वारे गावातील प्रत्येक घटकापर्यंत आरोग्य सेवा पोहोचवली जात आहे.

​पर्यावरण व शेती विकास: परिसरातील शेतकऱ्यांना प्रोत्साहन देण्यासाठी फळझाडांच्या रोपांचे वाटप करण्यात आले आहे.

​आरोग्य जनजागृती: क्षयरोग दिनानिमित्त विशेष जागरूकता मोहीम राबवण्यात आली.

​महिला सक्षमीकरण: आंतरराष्ट्रीय महिला दिनाचे औचित्य साधून नीरा येथे विशेष ‘फूड फेस्टिव्हल’चे आयोजन करण्यात आले.

​तसेच, नागरिकांना विविध कल्याणकारी योजनांची माहिती व लाभ मिळवून देण्यासाठी ‘हक्कदर्शक योजना केंद्र’ सुरू करण्यात आले आहे. ज्युबिलंट भरतीया फाउंडेशनच्या या विविध समाजोपयोगी उपक्रमांमुळे स्थानिक परिसरातून समाधान व्यक्त केले जात आहे.

सहसंपादक अक्षय थोरात

केंद्र शासन व महाराष्ट्र शासनाच्या  स्वच्छ महाराष्ट्र मिशन अभियानांतर्गत मालेगाव बु. नगरपंचायतीच्या स्वच्छता विभागासाठी मोठी उपलब्धी प्राप्त झाली आहे. नगरपंचायतीला ३००० लिटर क्षमतेची अत्याधुनिक सक्शन-कम-जेटिंग मशीन प्राप्त झाली असून, या वाहनाचे दिनांक २९ सप्टेंबर २०२६ रोजी विधिवत पूजन करण्यात आले.

या पूजन कार्यक्रम प्रसंगी नगरसेवक जयदीप पाटील, नगरपंचायतीचे पदाधिकारी, अधिकारी, कर्मचारी व नागरिक मोठ्या संख्येने उपस्थित होते.

मशीनचा उपयोग काय होणार?

सदर मशीनच्या माध्यमातून नगरपंचायत क्षेत्रातील अनेक प्रलंबित स्वच्छतेची कामे अधिक वेगाने आणि कार्यक्षमतेने होणार आहेत.

• – सेप्टिक टँकची साफसफाई
• – गटारे, नाले व ड्रेनेज लाईनची साफसफाई
• – सीवर लाईनमधील चोकअप दूर करणे
• – पावसाळी नाल्यांमधील गाळ व अडथळे काढणे
• – सांडपाणी व द्रव गाळ सक्शनद्वारे उचलणे

मशीनमध्ये उपलब्ध असलेल्या सक्शन व उच्चदाब जेटिंग प्रणालीमुळे बंद झालेल्या पाइपलाइन व ड्रेनेज लाईन स्वच्छ करणे तसेच सांडपाणी व्यवस्थापनाची कामे जलद व प्रभावीपणे करता येणार आहेत.

त्यामुळे नगरपंचायत क्षेत्रातील स्वच्छता व्यवस्थेला अधिक गती व कार्यक्षमता प्राप्त होणार असून, नागरिकांना तत्पर स्वच्छता सेवा उपलब्ध होण्यास मोठी मदत होणार आहे.

या नव्या यंत्रणेमुळे सफाई कामगारांना मानवी हस्तक्षेपाशिवाय सुरक्षित पद्धतीने काम करता येणार असून, मालेगाव बु. अधिक स्वच्छ आणि आरोग्यदायी बनवण्याच्या दिशेने हे एक महत्त्वाचे पाऊल ठरणार आहे.