पुणे.प्रतिनिधी

पुणे पोलीस आयुक्तालयाच्या परिमंडळ-४ च्या वतीने आगामी सार्वजनिक गणेशोत्सव – २०२६ च्या पार्श्वभूमीवर कायदा व सुव्यवस्था अबाधित राखण्याच्या उद्देशाने सार्वजनिक गणेशोत्सव मंडळांच्या पदाधिकाऱ्यांसोबत एक महत्त्वपूर्ण नियोजन व समन्वय बैठक आशीर्वाद पॅलेस, लेन नंबर १, टिंगरेनगर, विश्रांतवाडी, पुणे – १५ येथे खेळीमेळीच्या वातावरणात पार पडली.

गणेशोत्सव सण अवघ्या काही दिवसांवर येऊन ठेपला असताना उत्सव काळात कोणताही अनुचित प्रकार घडू नये, वाहतूक व्यवस्था सुरळीत राहावी, ध्वनीप्रदूषण नियंत्रण कायद्याचे पालन व्हावे आणि भाविकांची सुरक्षा सुनिश्चित व्हावी, या अनुषंगाने पोलीस प्रशासनाने ही पूर्वतयारी बैठक आयोजित केली होती.

*बैठकीस वरिष्ठ पोलीस अधिकाऱ्यांची प्रमुख उपस्थिती -*

या बैठकीस परिमंडळ-४ चे पोलीस उप-आयुक्त *मा. श्री. चिलुमुला रजनीकांत (भा.पो.से.)* हे प्रमुख मार्गदर्शक म्हणून उपस्थित होते. त्यांच्यासमवेत येरवडा विभागाचे सहा. पोलीस आयुक्त *श्री. सुनील जैतापूरकर* आणि खडकी विभागाचे सहा. पोलीस आयुक्त *श्री. ब्रम्हानंद गावडे* यांनी मंडळांना मार्गदर्शन केले.

तसेच बाणेर पोलीस ठाण्याचे वरिष्ठ पोलीस निरीक्षक *श्री. चंद्रशेखर सावंत*, चतु:श्रृंगी पोलीस ठाण्याचे वरिष्ठ पोलीस निरीक्षक *श्री. उत्तम भजनावळे*, येरवडा पोलीस ठाण्याचे वरिष्ठ पोलीस निरीक्षक *श्री. उमेश गीते*, विश्रांतवाडी पोलीस ठाण्याचे वरिष्ठ पोलीस निरीक्षक *श्री. राजेंद्र पन्हाळे*, विमानतळ / लक्ष्मीनगर पोलीस ठाण्याचे वरिष्ठ पोलीस निरीक्षक *श्री. रवींद्र कदम* आणि खडकी पोलीस ठाण्याचे वरिष्ठ पोलीस निरीक्षक *श्री. विक्रमसिंग कदम* हे देखील उपस्थित होते. यावेळी परिसरातील सर्व सार्वजनिक गणेशोत्सव मंडळांचे अध्यक्ष, पदाधिकारी व प्रतिनिधी मोठ्या संख्येने उपस्थित होते.

*पोलीस प्रशासनाच्या महत्त्वपूर्ण सूचना -*

बैठकीदरम्यान प्रशासनाकडून सर्व मंडळांना खालीलप्रमाणे कायदेशीर सूचना देण्यात आल्या –

१. गणेशोत्सव काळात सर्वोच्च न्यायालयाच्या व महाराष्ट्र शासनाच्या ध्वनीप्रदूषण नियंत्रण नियमांचे काटेकोरपणे पालन करावे.
२. मंडप उभारणी, विद्युत सुरक्षा, आपत्कालीन बाहेर जाण्याचा मार्ग (Emergency Exit) आणि गर्दी व्यवस्थापनाबाबत नियमांचे पालन करावे.
३. वाहतुकीस अडथळा निर्माण होणार नाही याची दक्षता घ्यावी व वाहतूक पोलिसांना सहकार्य करावे.
४. सीसीटीव्ही, अग्निशमन यंत्रणा व महिला व बालकांच्या सुरक्षेबाबत योग्य ती खबरदारी घ्यावी.

यावेळी मार्गदर्शन करताना पोलीस उप-आयुक्त श्री. चिलुमुला रजनीकांत म्हणाले, “गणेशोत्सव हा पुण्याचा मानाचा व परंपरेचा सण आहे. या काळात कोणत्याही शासकीय नियमांचे उल्लंघन होणार नाही याची दक्षता प्रत्येक मंडळाने घेणे बंधनकारक आहे. भाविकांची सुरक्षा आणि शहराची कायदा व सुव्यवस्था अबाधित राखण्यासाठी पोलीस प्रशासन मंडळांच्या पाठीशी खंबीरपणे उभे राहील.”

*मंडळांची सहकार्याची ग्वाही -*

बैठकीच्या शेवटी उपस्थित सर्व मंडळांच्या पदाधिकाऱ्यांनी पोलीस प्रशासनाने दिलेल्या सूचनांचे तंतोतंत पालन करून यंदाचा गणेशोत्सव अधिक सुरक्षित, शांततापूर्ण आणि आदर्श पद्धतीने साजरा करण्याची एकमुखाने ग्वाही दिली.

या बैठकीमुळे पोलीस प्रशासन व सार्वजनिक मंडळे यांच्यात योग्य समन्वय निर्माण झाला असून, यंदाचा गणेशोत्सव कायदेशीर चौकटीत आणि उत्साहात पार पडेल, असा विश्वास व्यक्त करण्यात आला.

या कार्यक्रमाचे आयोजन विघ्नहर्ता न्यास, पुणे शहराचे विश्वस्त *श्री. विवेक देव* यांनी केले होते.