प्रतिनिधी
लातूर जिल्ह्यातील गुन्हेगारीच्या घटनांमुळे चिंता व्यक्त होत असतानाच औसा शहरात भरदिवसा एका १९ वर्षीय तरुणावर कोयत्याने जीवघेणा हल्ला करण्यात आल्याची धक्कादायक घटना समोर आली आहे. शहरातील गजबजलेल्या जुन्या बसस्थानकासमोरील मीरा हॉटेलजवळ बुधवारी सकाळी साडेनऊच्या सुमारास हा प्रकार घडला. तेजस राम गायकवाड असे गंभीर जखमी तरुणाचे नाव असून, त्याच्यावर धारदार कोयत्याने डोक्यावर, हातांवर आणि पायांवर १० ते १२ वार करण्यात आल्याची माहिती आहे. जखमी तेजसला पुढील उपचारांसाठी लातूर येथील शासकीय रुग्णालयात दाखल करण्यात आले आहे.
प्राथमिक माहितीनुसार, चोरीच्या गुन्ह्यात अटक झालेल्या पवन जाधव याला तेजसने मदत केल्याच्या रागातून हा हल्ला करण्यात आल्याचा संशय आहे. तसेच हल्ल्यापूर्वी तेजस आणि आरोपीच्या मित्रामध्ये जुना वाद झाल्याची माहितीही समोर आली आहे. याच वादातून अक्षय उर्फ आकाश नरवडे याने तेजसला लक्ष्य केल्याचे प्राथमिक तपासात समोर आले आहे.
मिळालेल्या माहितीनुसार, तेजस मोटारसायकलवरून जुन्या बसस्थानकासमोरील मीरा हॉटेलजवळून जात असताना आरोपीने त्याला शिवीगाळ केली आणि चालत्या मोटारसायकलवरून खाली पाडले. त्यानंतर कोयत्याने त्याच्यावर वार करण्यास सुरुवात केली. या हल्ल्यात तेजस गंभीर जखमी झाला. हल्ल्यादरम्यान तो मदतीसाठी आर्त हाका मारत असल्याचेही प्रत्यक्षदर्शींच्या माहितीतून समोर आले आहे.
पोलीस घटनास्थळी; नागरिकांकडून मोबाईलवर चित्रीकरण
या घटनेतील आणखी एक धक्कादायक बाब म्हणजे हल्ल्याच्या वेळी घटनास्थळी पोलीस कर्मचारी उपस्थित असल्याची माहिती आहे. आरोपीच्या हातात धारदार कोयता असल्याने सुरुवातीला हस्तक्षेप करण्यात अडचणी आल्याचे सांगितले जात आहे. दरम्यान, घटनास्थळी उपस्थित अनेक नागरिक मदतीसाठी पुढे येण्याऐवजी मोबाईलवर चित्रीकरण करत असल्याचे समोर आले आहे. अखेर दोन नागरिकांनी पुढे येत आरोपीला रोखण्याचा प्रयत्न केला. त्यानंतर पोलिसांनी हस्तक्षेप केला; मात्र आरोपी घटनास्थळावरून पसार झाला.
पोलिसांना धक्काबुक्की केल्याचा आरोप; व्हिडिओ सोशल मीडियावर व्हायरल
हल्ल्यादरम्यान एका पोलीस कर्मचाऱ्याने आरोपीला तरुणाला मारू नको, असे सांगितल्यावर आरोपीने संबंधित पोलिसाला धक्का देत अपमानास्पद शब्द वापरल्याचे व्हिडिओमध्ये दिसत असल्याची माहिती आहे. या घटनेचा व्हिडिओ सोशल मीडियावर व्हायरल झाला असून, आरोपीने पोलिसांबाबत केलेल्या विधानामुळे परिसरात चर्चेला उधाण आले आहे. मात्र, या विधानावरून पोलिसांच्या भूमिकेबाबत कोणताही निष्कर्ष काढण्यापूर्वी संबंधित बाबींची अधिकृत चौकशी होणे आवश्यक आहे.
खुनाच्या प्रयत्नाचा गुन्हा दाखल; आरोपीच्या शोधासाठी तीन पथके
या प्रकरणी औसा पोलीस ठाण्यात आरोपी अक्षय उर्फ आकाश नरवडे याच्याविरुद्ध भारतीय दंड विधानाच्या कलम ३०७ अन्वये खुनाच्या प्रयत्नाचा गुन्हा दुपारी ४ वाजून ३३ मिनिटांनी दाखल करण्यात आल्याची माहिती आहे. स्थानिक गुन्हे शाखा आणि फॉरेन्सिक पथकाने घटनास्थळावरून रक्ताचे नमुने गोळा केले आहेत. उपविभागीय पोलीस अधिकारी कुमार चौधरी यांच्या मार्गदर्शनाखाली आरोपीचा शोध घेण्यासाठी तीन विशेष पथके रवाना करण्यात आली आहेत.
औसा शहरातील गजबजलेल्या रस्त्यावर घडलेल्या या घटनेमुळे नागरिकांच्या सुरक्षिततेचा प्रश्न पुन्हा ऐरणीवर आला आहे. भरदिवसा झालेल्या या हल्ल्यातील आरोपीला पोलीस कधी जेरबंद करतात आणि या प्रकरणातील सर्व बाबी तपासातून कशा स्पष्ट होतात, याकडे आता नागरिकांचे लक्ष लागले आहे.
