इंदापूरमधील नाथपंथी, डवरी, गोसावी समाजाकडून अनुदानाची मागणी

प्रतिनिधी

इंदापुर तालुक्यातील नाथपंथी, डवरी, गोसावी कुटुबांना शौचालयासाठी अनुदान दयावे अशी मागणी इंदापुर तालुका नाथपंथी डवरी गोसावी समाज युवा संघटनेच्यावतीने केली आहे. याबाबत संघटनेचे अध्यक्ष संजय शिंदे यांनी इंदापुर पंचायत समितीचे गटविकास अधिकारी यांचेकडे निवेदनाद्वारे मागणी केली. संजय शिंदे यांनी दिलेल्या निवेदनानुसार इंदापुर तालुक्यामध्ये नाथपंथी, डवरी, गोसावी समाज मोठया प्रमाणात आहे. समाजाला आर्थिक कारणांसह जागेचा प्रश्न आहे. साक्षरता व योग्य ज्ञानाअभावी डवरी गोसावी समाज शासनाच्या स्वच्छ भारत योजनेअंतर्गत शौचालयाच्या अनुदानापासुन वंचित आहे. शौचालय नसल्यामुळे समाजातील व्यक्तींना उघडयावर जावे लागते. त्यामुळे सुरक्षेसह स्वच्छेताचाही प्रश्न निर्माण होतो. त्यामुळे नाथपंथी डवरी गोसावी समाजातील कुटुंबाची आर्थिक स्थिती विचारात घेऊन समाजातील व्यक्तींना शौचालय बांधकामासाठी सरसकट अनुदान मंजुर करावे अशी मागणी संघटनेचे अध्यक्ष संजय शिंदे यांनी केली आहे.