प्रतिनिधी
येवलेवाडी येथील सिंहगड कॉलेज ऑफ इंजिनीअरिंगच्या वसतिगृहात तरूणाने गळफास घेवून आत्महत्या केल्याचा प्रकार उघडकीस आला आहे. याप्रकरणी कोंढवा पोलीस ठाण्यात अकस्मात मृत्यूची नोंद करण्यात आली आहे.
अभिषेक प्रवीण शेळके (वय २२, रा. शिर्डी, अहमदनगर) असे आत्महत्या केलेल्याचे नाव आहे. अभिषेक हा मूळचा शिर्डी येथील असून, तो पुण्यात शिक्षणासाठी आला होता. अभियांत्रिकीच्या तिसर्‍या वर्षाला तो होता. मंगळवारी तो वसतिगृहातील रूममध्ये एकटाच होता. सायंकाळी त्याचे मित्र परीक्षा देवून वसतिगृहात आले. त्यांनी दरवाजा वाजविल्यानंतर हा प्रकार उघडकीस आला. या घटनेची माहिती मिळताच कोंढवा पोलिसांनी घटनास्थळी धाव घेतली.
अभिषेकच्या आत्महतेमागचे नेमके कारण समजू शकलेले नाही. मात्र, त्याला काही विषय अवघड गेले होते, असे पोलिसांकडून सांगण्यात आले. त्यातूनच त्याने हे पाऊल उचलल्याची शक्यता आहे. कोंढवा पोलीस तपास करत आहेत.
