प्रतिनिधी
महाराष्ट्राच्या कायदा-सुव्यवस्था आणि अंतर्गत सुरक्षेच्या दृष्टीने महत्त्वपूर्ण घडामोड म्हणून ज्येष्ठ आयपीएस अधिकारी सदानंद वसंत दाते यांची महाराष्ट्राच्या पोलीस महासंचालक (DGP) पदी नियुक्ती करण्यात आली असून, ते ३ जानेवारी २०२६ रोजी अधिकृतपणे पदभार स्वीकारणार आहेत.
१९९० बॅचचे आयपीएस अधिकारी असलेले सदानंद दाते हे कर्तव्यनिष्ठ, धाडसी आणि परिणामकारक प्रशासक म्हणून ओळखले जातात. २६/११ मुंबई दहशतवादी हल्ल्यावेळी दहशतवाद्यांविरोधात थेट कारवाई करताना ते गंभीर जखमी झाले होते. मात्र जीवावर उदार होऊन केलेल्या त्या कारवाईमुळे त्यांचे नाव देशभरात शौर्याचे प्रतीक ठरले. या अतुलनीय धैर्यासाठी त्यांना राष्ट्रपती पोलीस पदक प्रदान करण्यात आले आहे.
महाराष्ट्रात त्यांनी Anti-Terrorism Squad सारख्या संवेदनशील विभागाचे नेतृत्व केले. त्यानंतर केंद्र सरकारने त्यांच्यावर विश्वास टाकत त्यांची राष्ट्रीय तपास यंत्रणा च्या महासंचालकपदी नियुक्ती केली. एनआयएचे प्रमुख म्हणून काम करताना त्यांनी दहशतवाद, कट्टरतावाद, संघटित गुन्हेगारी आणि आंतरराज्य तपास प्रकरणांमध्ये व्यवस्थात्मक सुधारणा, आधुनिक तंत्रज्ञानाचा वापर आणि गुप्तचर-आधारित तपास यंत्रणा अधिक सक्षम केली.
३ जानेवारीला पदभार स्वीकारल्यानंतर त्यांच्या समोर सायबर गुन्हेगारी, शहरी भागातील संघटित गुन्हे, दहशतवादाचा संभाव्य धोका आणि निवडणूक काळातील सुरक्षा व्यवस्थापन ही मोठी आव्हाने असणार आहेत. मात्र राज्य आणि राष्ट्रीय पातळीवरील त्यांच्या अनुभवामुळे महाराष्ट्र पोलीस दल अधिक कार्यक्षम, पारदर्शक आणि जनाभिमुख होईल, अशी अपेक्षा व्यक्त केली जात आहे.
नव्या नेतृत्वाखाली महाराष्ट्र पोलीस दल कायदा-सुव्यवस्था अधिक बळकट करण्यासह नागरिकांच्या सुरक्षिततेला सर्वोच्च प्राधान्य देईल, असा विश्वास प्रशासन आणि जनतेतून व्यक्त होत आहे.
By
