प्रतिनिधी

पुणे ग्रामीण जिल्ह्यातील वडगाव निंबाळकर पोलीस स्टेशन आणि स्थानिक गुन्हे शाखेने संयुक्त कारवाई करत घरफोडी व मोटारसायकल चोरी प्रकरणातील आरोपींना निष्पन्न केले आहे. या कारवाईत तीन मोटारसायकल चोरीचे गुन्हे व एक घरफोडीचा गुन्हा उघडकीस आला असून, आरोपींकडून एकूण १ लाख ६५ हजार ५०० रुपयांचा मुद्देमाल जप्त करण्यात आला आहे.

मिळालेल्या माहितीनुसार, मौजे कोन्हाळे बु. (ता. बारामती) येथील कठीण पूल परिसरातून फिर्यादीची लाल रंगाची मोटारसायकल (एमएच ४२ एपी ९४९६) चोरीस गेल्याची तक्रार वडगाव निंबाळकर पोलीस स्टेशनमध्ये दाखल झाली होती. या प्रकरणाचा तपास सुरू असताना पोलीस पथक पेट्रोलिंगदरम्यान एका संशयित इसमाला नंबर प्लेट नसलेली मोटारसायकल चालविताना आढळला.

त्याच्याकडे चौकशी केली असता, त्याने आपल्या साथीदारांसह विविध ठिकाणांहून मोटारसायकली चोरी केल्याची कबुली दिली. कोन्हाळे बु., फलटण ग्रामीण (जि. सातारा) आणि लोणंद (जि. सातारा) येथून तीन मोटारसायकली चोरी केल्याचे समोर आले. तसेच, वडगाव परिसरात एका बंद घरात घरफोडी केल्याचेही निष्पन्न झाले आहे.

या प्रकरणात एक विधीसंघर्षित बालक व त्याचे साथीदार – मयूर नितीन भोसले (रा. कालठण नं. १, ता. इंदापूर) आणि दोन अनोळखी इसम यांचा सहभाग असल्याचे स्पष्ट झाले आहे. संबंधित चार गुन्हे विविध पोलीस स्टेशनमध्ये भारतीय न्याय संहिता २०२३ अंतर्गत दाखल आहेत.

पोलीसांनी आरोपींच्या सांगण्यावरून चोरीस गेलेल्या तीन मोटारसायकली आणि इतर मुद्देमाल जप्त केला असून, पुढील तपास सुरू आहे. आणखी काही गुन्हे उघडकीस येण्याची शक्यता पोलीसांनी व्यक्त केली आहे.

ही कारवाई पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड व स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली पार पडली. या मोहिमेत वडगाव निंबाळकर पोलीस स्टेशन व स्थानिक गुन्हे शाखेच्या अधिकाऱ्यांनी व कर्मचाऱ्यांनी सक्रिय सहभाग घेतला.

पोलिसांच्या या कारवाईमुळे परिसरातील गुन्हेगारीवर आळा बसण्यास मदत होणार असून नागरिकांमध्ये सुरक्षिततेची भावना निर्माण झाली आहे.