वडगाव निंबाळकर,
वडगाव निंबाळकर पोलीस ठाण्यात एका युवकाविरुद्ध सोशल मीडियाचा गैरवापर करून महिलेचा बनावट इन्स्टाग्राम आयडी तयार करणे, अश्लील संदेश पाठवणे, अश्लील फोटो व व्हिडिओची मागणी करणे तसेच ते व्हायरल करण्याची धमकी देऊन बदनामी केल्याप्रकरणी गुन्हा दाखल करून आरोपीला अटक करण्यात आलेली आहे.
पोलीसांनी दिलेल्या माहितीनुसार, आरोपी दिपक मधूकर दुबळे (रा. करंजे, ता. बारामती, जि. पुणे) याने एप्रिल २०२६ पासून ते ३ जुलै २०२६ या कालावधीत एका महिलेच्या नावाने बनावट इन्स्टाग्राम आयडी तयार केल्याचा आरोप आहे. या आयडीवरून फिर्यादी महिलेला अश्लील फोटो पाठवून तिच्याकडे नग्न फोटो पाठविण्याची मागणी केली. तसेच, “फोटो व्हायरल करायचे नसतील तर नग्न अवस्थेत व्हिडिओ कॉल करून बोल,” असा संदेश पाठवून दबाव टाकल्याचे फिर्यादीत नमूद करण्यात आले आहे.
याप्रकरणी आरोपीने महिलेचे नग्न फोटो व व्हिडिओ स्वतःच्या मोबाईलमध्ये जतन करून ते परिसरातील काही व्यक्तींना पाठवल्याने तिची बदनामी झाली तसेच तिच्या मनात लज्जा व भीती निर्माण झाल्याचे तक्रारीत म्हटले आहे.
या प्रकरणी वडगाव निंबाळकर पोलीस ठाण्यात गुन्हा रजिस्टर क्रमांक १३१/२०२६ अन्वये भारतीय न्याय संहिता (BNS) कलम ३१९, ७७, ७८, २९५, तसेच बाल लैंगिक अपराध संरक्षण अधिनियम (POCSO) कलम १२, १४, १५ आणि माहिती तंत्रज्ञान अधिनियम कलम ६७(अ), ६७(ब), ६६(क), ६६(ड) अंतर्गत गुन्हा दाखल करण्यात आला आहे.
या गुन्ह्याचा पुढील तपास पोलीस निरीक्षक पवार हे करीत असून, संबंधित प्रकरणाचा अहवाल विशेष न्यायालय, बारामती येथे पाठविण्याची कार्यवाही सुरू असल्याची माहिती पोलिसांनी दिली.
