प्रतिनिधी
छळामुळे विवाहितेने गळफास घेऊन आत्महत्या केल्याची घटना हडपसर भागात घडली. विवाहितेला आत्महत्येस प्रवृत्त केल्याप्रकरणी फुरसुंगी पोलिसांकडून पती, सासू, सासरे, दिरासह नातेवाइकांविरुद्ध गुन्हा दाखल करण्यात आला.
प्रतीक्षा अभिषेक खळदकर (वय २७) असे आत्महत्या केलेल्या विवाहितेचे नाव आहे. याप्रकरणी पती अभिषेक आनंद खळदकर, सासरे आनंद, सासू सविता, दीर चेतन, नणंद वैभवी (सर्व रा. धनकवडी), तसेच निर्मला आवटे यांच्याविरुद्ध गुन्हा दाखल करण्यात आला. याबाबत प्रतीक्षाची आई उषा राजेंद्र हरपळे (वय ४३, रा. हरपळे आळी, फुरसुंगी, हडपसर) यांनी फिर्याद दिली आहे. पोलिसांनी दिलेल्या माहितीनुसार, प्रतीक्षाचा ११ जून २०२० रोजी अभिषेक खळदकर याच्याशी विवाह झाला होता. हुंड्यात प्रतीक्षाला सात तोळे सोन्याचे दागिने देऊन विवाहाचा खर्चही हरपळे कुटुंबीयांनी केला होता. सासरी नांदत असताना प्रतीक्षाला वेळोवेळी टोमणे मारून तिचा छळ करण्यात आला. छळामुळे ती माहेरी निघून आली. तिने राहत्या घरात गळफास घेऊन ६ एप्रिल रोजी आत्महत्या केली. प्रतीक्षाचा छळ केल्याने तिने आत्महत्या केली, अशी फिर्याद तिची आई उषा हरपळे यांनी नुकतीच दिली.
