पुण्यात जुना बाजार येथे दुकानांना आग. अनेक व्यावसायिकांचे प्रचंड मोठे नुकसान.

प्रतिनिधी.

पुणे : पुण्यातील जुना बाजार झोपडपट्टी परिसरात भीषण आग लागली. या आगीची माहिती मिळताच अग्निशमन दलाच्या 8 गाड्या घटनास्थळी दाखल झाल्या आहेत.

आगीवर नियंत्रण मिळवण्याचे अग्निशमन दलाकडून प्रयत्न सुरू आहेत. ही आग नेमकी कशामुळे लागली याचं कारण अद्याप स्पष्ट झालं नाही. पुण्यातील मंगळवार पेठ, जुना बाजार येथे दुकानांना मोठी आग लागल्याची माहिती मिळाली आहे. आगीमुळे परिसरात धुराचे लोळ उठले होते. बुधावारी सकाळी ही आग लागल्याची माहिती मिळाली आहे.

अग्निशामक विभागाचे अधिकारी पंकज जगताप यांनी दिलेल्या माहितीनुसार, मंगळवार पेठेतील जुना बाजार येथे आग लागल्याची माहिती सकाळी ७.३० वाजण्याच्या सुमारास मिळाली. त्यानंतर घटनास्थळी काही मिनिटांत ८ गाड्या दाखल झाल्या आणि चारही बाजूने पाण्याचा मारा करून आगीवर नियंत्रण मिळविण्यात यश आले आहे. तर या घटनेमध्ये ८ ते १० दुकानांतील माल जळून खाक झाला आहे. या दुकानांत इलेक्ट्रिक साहित्य आणि मोटारी होत्या. या घटनेमध्ये लाखो रुपयांचे नुकसान झाले असून आग कशामुळे लागली हे अद्यापपर्यंत समजू शकले नसल्याचे त्यांनी सांगितले.