प्रतिनिधी
महाराष्ट्रातील पुण्यात गणेशोत्सवाच्या शेवटच्या दिवशी गणपती विसर्जनाच्या वेळी एका कुटुंबावर २१ जणांनी हल्ला केल्याची धक्कादायक घटना समोर आली आहे. त्यामागील कारण म्हणजे त्यांच्या कुटुंबातील एका व्यक्तीचा मृत्यू झाल्याने त्यांनी गणपती विसर्जन मिरवणुकीत मोठ्या आवाजात संगीत वाजवण्यास मनाई केली होती.
पिंपरी चिंचवडमधील सोमाटने फाट्याजवळील गणेश नगरमध्ये ही घटना घडल्याचे पोलिसांनी सांगितले. यामध्ये तक्रारदार सुनील शिंदे यांच्या मुलाचा नुकताच मृत्यू झाला होता. त्यामुळे विसर्जन मिरवणूक त्यांच्या घराजवळून जात असताना त्यांनी मोठ्या आवाजात संगीत वाजवू नका, असे सांगितले, कारण त्यांच्या मुलाच्या मृत्यूमुळे कुटुंबात शोककळा पसरली होती.
तळेगाव दाभाडे पोलिस ठाण्याच्या अधिकाऱ्याने सांगितले की, “मूर्तीचे विसर्जन करून परतत असताना आरोपींनी त्यांच्यावर लोखंडी रॉड, काठ्या आणि धारदार शस्त्रांनी हल्ला केला. यादरम्यान शिंदे, त्यांच्या कुटुंबातील काही सदस्य आणि त्यांचा चालक गंभीर जखमी झाला.”
अधिकाऱ्याने सांगितले की, हल्ल्याप्रकरणी सर्व २१ जणांना अटक करण्यात आली आहे. ते म्हणाले की, 21 आरोपींवर भारतीय दंड संहिता आणि शस्त्रास्त्र कायद्याच्या विविध कलमांतर्गत हत्येचा प्रयत्न, दंगल आणि इतर गुन्ह्यांमध्ये आरोप ठेवण्यात आले आहेत.
पुण्यातील गणपती उत्सवाच्या शेवटच्या दिवशी ३० तासांहून अधिक काळ सार्वजनिक मिरवणूक चालली आणि २,९०४ गणेशमूर्तींचे विसर्जन करण्यात आले.
