प्रतिनिधी
भिवंडी येथे ३० लाख रुपये किमतीच्या बनावट नोटा ठाणे गुन्हे अन्वेषण शाखेने जप्त केल्या आहेत. याप्रकरणी शांतीनगर पोलीस ठाण्यात तीन जणांविरोधात गुन्हा दाखल झाला आहे. सुरज शेंडे (३२), भारत सासे (३८) आणि स्पप्नील पाटील (३८) अशी आरोपींची नावे असून पोलिसांनी त्यांना ताब्यात घेतले आहे.
भिवंडी येथील अवचितपाडा परिसरात काहीजण भारतीय बनावटीचे चलन घेऊन येणार असल्याची माहिती ठाणे गुन्हे अन्वेषण शाखेच्या भिवंडी युनीटला मिळाली होती. या माहितीच्या आधारे, पथकाने शनिवारी रात्री अवचितपाडा येथे सापळा रचला. अवचितपाडा येथे रिक्षामधून तीन जण बनावट नोटा घेऊन आले. पोलिसांनी त्यांना तात्काळ ताब्यात घेतले. त्यांची चौकशी केली असता, त्यांनी त्यांची नावे सुरज शेंडे, भारत सासे आणि स्पप्नील पाटील असल्याचे सांगितले. त्यांची झडती घेतली असता, त्यांच्याकडील बॅगेत ५०० रुपये किमतीच्या बनावट नोटा आढळून आल्या. त्यांची चौकशी केली असता, त्यांनी या नोटा बनावट असल्याची कबूली दिली.
