प्रतिनिधी
शहरात मध्य भागातील गणेश पेठ, तसेच खडकी भागात घराचे कुलूप तोडून चोरांनी दहा लाख रुपयांचा ऐवज लांबविल्याची घटना घडली. गणेश पेठेतील हमजेखान चौकात एका घराचे कुलूप तोडून चोरट्यांनी सोन्याचे दागिने, ६५ हजारांची रोकड असा सहा लाख ८५ हजारांचा ऐवज लांबविल्याची घटना घडली. याबाबत एकाने फरासखाना पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, तक्रारदार हमजेखान चौकातील एका इमारतीत राहायला आहेत. ८ जून रोजी तक्रारदार आणि कुटुंबीय बाहेरगावी गेले होते. चोरट्यांनी घराचे कुलूप तोडून कपाटातील रोकड आणि सोन्याचे दागिने असा सहा लाख ८५ हजार रुपयांचा ऐवज लांबवून चोरटे पसार झाले. पोलीस उपनिरीक्षक अमोल काळे तपास करत आहेत.
खडकीतील रेंजहिल्स भागातील एका घराचे कुलूप तोडून चोरट्यांनी ५० हजारांची रोकड आणि सोन्याचे दागिने असा तीन लाख रुपयांचा ऐवज लांबविल्याची घटना उघडकीस आली. याबाबत एकाने खडकी पोलीस ठाण्यात फिर्याद दिली आहे. तक्रारदार १३ जून रोजी सकाळी घर बंद करून बाहेर गेले होते. त्या वेळी चोरट्यांनी घराचे कुलूप तोडून कपाटातील ऐवज चोरून नेला. पोलीस उपनिरीक्षक दिग्विजय चौगले तपास करत आहेत.
कोथरूडमध्ये वस्त्रदालनातून सहा लाख ८४ हजारांचे कपडे चोरून नेल्याची घटना घडली. याबाबत एकाने कोथरूड पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदाराचे पौड रस्त्यावर वस्त्रदालन आहे. चोरट्यांनी वस्त्रदालनाच्या दरवाजाचे कुलूप तोडून आत प्रवेश केला. चोरांनी दुकानातील सहा लाख ८४ हजारांचे विविध प्रकारचे कपडे चोरून नेले. सहायक पोलीस निरीक्षक आळेकर तपास करत आहेत.
By
