प्रतिनिधी
दहशत माजवणाऱ्या टोळ्यांचे धाबे दणाणले; नवीन वर्षाच्या पार्श्वभूमीवर विशेष मोहीम
बारामती शहर आणि तालुक्यात वारंवार गंभीर गुन्हे करणाऱ्या आणि सर्वसामान्यांमध्ये दहशत निर्माण करणाऱ्या सराईत गुन्हेगारांना जिल्ह्याबाहेर काढण्याची प्रक्रिया पोलिसांनी सुरू केली आहे. आज पोलिसांनी अशा ५ हून अधिक सराईत गुंडांच्या तडीपारीचा प्रस्ताव वरिष्ठ स्तरावर पाठवला असून, यामुळे गुन्हेगारी वर्तुळात मोठी खळबळ उडाली आहे.
गेल्या काही दिवसांत बारामतीत शस्त्रांची जप्ती आणि अवैध धंद्यांवर झालेले छापे यानंतर पोलीस प्रशासन आता ‘ॲक्शन मोड’मध्ये आले आहे. जे गुन्हेगार जामिनावर सुटल्यानंतर पुन्हा गुन्हेगारीत सक्रिय होतात, अशांची यादी तयार करण्यात आली आहे. यामध्ये प्रामुख्याने मारामारी, बेकायदेशीर शस्त्रे बाळगणे आणि अवैध वाळू उपशात सक्रिय असलेल्या टोळी प्रमुखांचा समावेश आहे.
”शहरात शांतता आणि सुव्यवस्था राखणे आमचे प्राधान्य आहे. जे वारंवार गुन्हे करत आहेत, त्यांना बारामतीतून हद्दपार करण्यासाठी आम्ही कटिबद्ध आहोत. कोणत्याही टोळीला डोके वर काढू दिले जाणार नाही,” असा कडक इशारा बारामती पोलीस प्रशासनाने दिला आहे.
या कारवाईमुळे सर्वसामान्य नागरिकांनी समाधान व्यक्त केले असून, गुन्हेगारांवर पोलिसांचा वचक निर्माण झाला आहे.
तडीपारीचा आदेश लागू होताच, या गुन्हेगारांना तातडीने जिल्ह्याच्या हद्दीबाहेर सोडावे लागते. आदेशाचे उल्लंघन करून ते पुन्हा शहरात दिसल्यास त्यांना थेट अटक करून तुरुंगात टाकले जाते.
