प्रतिनिधी

जुन्नर तालुक्यातील पारगाव तर्फे मढ गावच्या हद्दीत बगाडवाडी येथे तळेरान गावच्या शिवेवर राहत असलेल्या मुकने कुटुंबात अत्यंत दुर्दैवी घटना घडली असून मुलाने झोपेत असलेल्या वडीलाची व सख्या भावाची दगडाने ठेचून हत्या केली असल्याची घटना बुधवारी सकाळी उघडकीस आली असून ओतूरचे सहायक पोलीस निरीक्षक ज्ञानेश्वर बाजगिरे यांनी या घटनेला दुजोरा दिली आहे.

जयराम महादू मुकने वय.६०, राजेंद्र जयराम मुकने वय.२७ असे हत्या झालेल्या वडील व भावाची नावे असून त्यांची हत्या बाबजी जयराम मुकने वय.३३ याने केली असल्याचा प्राथमिक माहिती मिळाली आहे.

याबाबत स्थानिकांकडून मिळालेली माहिती अशी की बाबजी मुकने व त्यांचे वडील जयराम मुकने व राजेंद्र मुकने हे एकत्र एका झोपडी वजा घरात राहत होते. मंगळवारी सर्व एकत्र झोपले होते.त्यांच्यात किरकोळ वाद झाला होता. याच वादाचा राग मनात धरून बाबजी यांने दगडाने मारून त्यांची हत्या केली.

तसेच त्यांच्या बाजूलाच झोपून राहिला.सकाळी परीसरातील नागरीकांनी त्यांना मृत पाहिले असता पोलिसांना या घटनेची माहिती दिली.त्यांनतर ओतूर पोलिसांच्या पथकाने घटनास्थळी जाऊन पंचनामा करून मृतदेह ताब्यात घेऊन शवविच्छेदनासाठी ओतूर प्राथमिक आरोग्य केंद्रात दाखल केला आहे.तसेच स्थानिकांच्या माहिती वरून बाबजी मुकने यांस ताब्यात घेतले आहे. याबाबत तक्रार नोंदविण्याचे काम ओतूर पोलिस करत आहेत.तसेच पुढील तपास ओतूर पोलिस करत आहेत.