प्रतिनिधी
दुचाकी पुढे नेण्याच्या (ओव्हरटेक) वादातून तरुणाचा अल्पवयीनांनी कोयत्याने वार करुन निर्घृण खून केल्याची धक्कादायक घटना सिंहगड रस्त्यावरील हिंगणे खुर्द भागात घडली. अल्पवयीनांनी तरुणावर तब्बल ३५ वार केले. याप्रकरणी सिंहगड रस्ता पोलिसांनी दोन अल्पवयीनांना ताब्यात घेतले असून, त्यांच्याबरोबर असलेल्या एका साथीदाराचा शोध सुरू आहे.
अभय मारुती सुर्यवंशी (वय २०, रा.गणेशनगर कॉलनी, हिंगणे खुर्द, सिंहगड रस्ता) असे खून झालेल्या तरुणाचे नाव आहे. खून करणारे युवक अल्पवयीन आहेत. पोलिसांनी दिलेल्या माहितीनुसार, अभय हा एका मिठाई विक्री दुकानात काम करतो. अल्पवयीन युवक आणि अभय एकाच भागात राहायला आहेत. दुचाकी पुढे नेण्याच्या कारणावरुन त्यांच्यात वाद झाला होता. शुक्रवारी (२५ ऑक्टोबर) सायंकाळी साडेसहाच्या सुमारास गणेशनगर कॉलनीतील घरासमोर अभय थांबला होता. त्यावेळी अल्पवयीनांनी त्याच्यावर कोयत्याने वार केले. अल्पवयीनांनी त्याच्यावर एकापाठोपाठ तब्बल ३५ वार केल्याने त्याचा जागीच मृत्यू झाला. हा प्रकार उघडकीस आल्यानंतर परिसरात घबराट उडाली. त्याला तातडीने रुग्णालयात दाखल करण्यात आले. उपचारांपूर्वीच त्याचा मृत्यू झाला होता.
या घटनेची माहिती मिळताच सिंहगड रस्ता पोलीस ठाण्याचे वरिष्ठ पोलीस निरीक्षक राघवेंद्रसिंह क्षीरसागर यांनी घटनास्थळी भेट दिली. पोलिसांनी पसार झालेल्या दोघांना रात्री ताब्यात घेतले. त्यांच्याबरोबर असलेला एक साथीदार शहरातून पसार झाला आहे. त्याला ताब्यात घेण्यासाठी पोलिसांचे पथक रवाना झाले आहे.
याप्रकरणातील एका अल्पवयीनाविरुद्ध चार दिवसांपूर्वी खंडणीचा गुन्हा दाखल झाला होता. या गुन्ह्यात त्याला बाल न्याय मंडळात हजर करण्यात आले होते. बाल न्यायालयाने त्याला जामीन मंजूर केल्यानंतर दोनच दिवसात त्याने खून केला. पोलीस निरीक्षक क्षीरसागर तपास करत आहेत.
