प्रतिनिधी
दुष्काळी तालुक्यात पाण्यासाठी वणवण सुरू असतानाच उमदी येथे एका विहिरीतून पाण्यासोबत पेट्रोलसदृश पदार्थ येत असल्याचा प्रकार समोर आला आहे. विहिरीच्या पाण्यावर पेट्रोलसदृश तवंग दिसून येत असून उग्र वासही येत असल्याने परिसरात खळबळ उडाली आहे. हा पदार्थ नेमका कोणता आहे आणि तो विहिरीच्या पाण्यात कसा पोहोचला, याचा तपास प्रशासनाकडून सुरू आहे.
उमदी येथील दुंडाप्पा माळी यांच्या विहिरीच्या पाण्यात गेल्या वर्षभरापासून पेट्रोलसदृश वास येत असल्याचे सांगण्यात येत होते. मात्र, काल सायंकाळी विहिरीच्या पाण्यावर पेट्रोलसदृश पदार्थाचा तवंग स्पष्टपणे दिसून आल्याचे ग्रामस्थांनी सांगितले. विहिरीतील पाणी शेतात सोडल्यानंतर पेट्रोलसदृश वास आणि तवंग मोठ्या प्रमाणात जाणवू लागला.
यानंतर काही शेतकऱ्यांनी काडीपेटी ओढून पाण्यात टाकल्यानंतर आग लागल्याचा दावा ग्रामस्थांनी केला आहे. एवढेच नव्हे, तर ज्या भागापर्यंत विहिरीचे पाणी शेतात गेले होते, त्या परिसरातही आग लागल्याचे ग्रामस्थांचे म्हणणे आहे. त्यामुळे विहिरीला खरंच पेट्रोलचे झरे लागले आहेत का, असा प्रश्न उपस्थित झाला आहे.
घटनेची माहिती मिळताच प्रशासनाने घटनास्थळी धाव घेतली असून विहिरीच्या पाण्यात पेट्रोलसदृश पदार्थ येण्याचे नेमके कारण काय, याची तपासणी सुरू केली आहे. विहिरीच्या समोरच पेट्रोल पंप असल्याचे निदर्शनास आले आहे. त्यामुळे पेट्रोल पंपातून काही प्रकारची गळती होऊन हा पदार्थ विहिरीच्या पाण्यात मिसळला आहे का, याचाही तपास केला जात आहे.
दरम्यान, संबंधित पदार्थ खरोखर पेट्रोल आहे का, तो नेमका कोणता आहे आणि विहिरीच्या पाण्यात तो पोहोचला कसा, असे अनेक प्रश्न निर्माण झाले आहेत. या घटनेनंतर उमदीसह परिसरात उलटसुलट चर्चांना उधाण आले आहे.
जत तालुका आधीच दुष्काळी परिस्थितीचा सामना करत असून अनेक भागांत पाण्याची चणचण आहे. अशा परिस्थितीत विहिरीच्या पाण्यात पेट्रोलसदृश पदार्थ आढळल्याने ग्रामस्थांमध्ये चिंता व्यक्त होत आहे. या पदार्थाचे स्वरूप आणि घटनेचे नेमके कारण प्रशासनाच्या तपासणीनंतरच स्पष्ट होणार आहे.
