प्रतिनिधी
१९ वर्षीय तरुण कार चालवत असल्याची प्रत्यक्षदर्शींची माहिती; चतु:शृंगी पोलिसांकडून तपास सुरू
पाषाण-बावधन रस्त्यावर नेकलेस गार्डनजवळ झालेल्या भीषण रस्ते अपघातात सॉफ्टवेअर इंजिनिअर विरेंद्र द्विवेदी यांचा मृत्यू झाला. भरधाव कारने त्यांना जोरदार धडक दिल्याने ते गंभीर जखमी झाले. उपचारासाठी त्यांना त्याच कारमधून रुग्णालयात नेण्यात आले. मात्र, उपचारादरम्यान त्यांचा मृत्यू झाला.
मिळालेल्या माहितीनुसार, विरेंद्र द्विवेदी हे नियमितपणे व्यायाम करत होते. त्यावेळी पाषाण-बावधन रस्त्यावर नेकलेस गार्डनजवळ हा अपघात झाला. भरधाव वेगाने आलेल्या कारने द्विवेदी यांना धडक दिली. अपघाताची माहिती मिळताच पोलिसांनी घटनास्थळी धाव घेतली. द्विवेदी यांचा मृतदेह ताब्यात घेऊन शवविच्छेदनासाठी रुग्णालयात पाठविण्यात आला.
या अपघातातील कारच्या मालकीबाबतही प्रश्न उपस्थित झाले आहेत. प्राथमिक माहितीनुसार, संबंधित कार BLUERAYS Developers या कंपनीच्या नावावर असल्याचे समजते. तसेच कारचा पत्ता ABIL हाऊसचा असल्याची माहिती समोर आली आहे.
मात्र, अपघाताच्या वेळी ही कार नेमकी कोणाच्या ताब्यात होती आणि कार कोण चालवत होते, याबाबत पोलिसांकडून अद्याप अधिकृत माहिती देण्यात आलेली नाही. प्रत्यक्षदर्शींनी दिलेल्या माहितीनुसार, कार १९ वर्षीय तरुण चालवत होता.
या प्रकरणी चतु:शृंगी पोलिस ठाण्यात गुन्हा दाखल करण्यात आला असून, पोलिसांकडून अपघाताचा पुढील तपास सुरू आहे.
