पणदरे येथे ३० वर्षीय विवाहित महिलेचा खून;

प्रतिनिधी अक्षय थोरात

अज्ञात आरोपीविरुद्ध गुन्हा दाखल
डोक्यावर व चेहऱ्यावर हत्याराने मारहाण करून गळा आवळल्याचा प्राथमिक संशय; पोलिसांकडून तपास सुरू
पांदरे, ता. बारामती : पांदरे गावाच्या हद्दीत राहत्या घरातील झोपण्याच्या खोलीत ३० वर्षीय विवाहित महिलेचा मृतदेह आढळून आल्याने परिसरात खळबळ उडाली आहे. वैशाली तानाजी पवार (वय ३०, रा. पांदरे, ता. बारामती, जि. पुणे) असे मृत महिलेचे नाव आहे.
पोलिसांनी दिलेल्या माहितीनुसार, १२ सप्टेंबर २०२६ रोजी सायंकाळी ७.४५ वाजण्यापूर्वी पांदरे येथील राहत्या घरातील झोपण्याच्या खोलीत ही घटना घडल्याचे फिर्यादीत नमूद करण्यात आले आहे.
फिर्यादी रंजना लक्ष्मण पवार यांनी दिलेल्या तक्रारीनुसार, अज्ञात व्यक्तीने वैशाली पवार यांच्या डोक्यावर व चेहऱ्यावर अज्ञात हत्याराने मारहाण केली. तसेच टॉवेलच्या साहाय्याने गळा आवळून त्यांचा खून केल्याचा आरोप तक्रारीत करण्यात आला आहे. मात्र, या घटनेमागील नेमके कारण अद्याप स्पष्ट झालेले नाही.
या प्रकरणी माळेगाव पोलीस ठाण्यात गुन्हा रजिस्टर क्रमांक २४६/२०२५, भारतीय न्याय संहिता (BNS) कलम १०३(१) अन्वये अज्ञात आरोपीविरुद्ध गुन्हा दाखल करण्यात आला आहे.
घटनेची माहिती मिळताच पोलिस अधिकाऱ्यांनी घटनास्थळी भेट देऊन पाहणी केली. उपविभागीय पोलीस अधिकारी कदम यांनी १२ सप्टेंबर रोजी रात्री ९.३० वाजल्यापासून १३ सप्टेंबर रोजी पहाटे २.५० वाजेपर्यंत घटनास्थळी भेट देऊन तपासाबाबत मार्गदर्शन केले.
या प्रकरणाचा पुढील तपास सहाय्यक पोलीस निरीक्षक कुलदीप संकपाळ करीत असून, गुन्हा दाखल करण्याची कार्यवाही पोलीस उपनिरीक्षक ओमासे यांनी केली आहे. अज्ञात आरोपीचा शोध घेण्यासाठी पोलिसांकडून तपास सुरू आहे.