उपमुख्यमंत्री सुनेत्रावहिनी पवार यांच्या प्रमुख उपस्थितीत सन्मानपत्र देऊन गौरव
निंबूत : पंचायत समिती बारामती यांच्या वतीने सन २०२२-२०२६ चा गुणवंत शिक्षक पुरस्कार केंद्रीय प्राथमिक शाळा निंबूत येथील शिक्षिका सौ. सुवर्णा महेंद्र शेंडकर यांना प्रदान करण्यात आला. उपमुख्यमंत्री श्रीमती सुनेत्रावहिनी पवार यांच्या प्रमुख उपस्थितीत सन्मानपत्र देऊन त्यांचा गौरव करण्यात आला.
सौ. सुवर्णा शेंडकर यांनी आपल्या शैक्षणिक सेवेला भोर येथे सुरुवात केली. त्यानंतर शेंडकरवाडी आणि सध्या निंबूत येथील केंद्रीय प्राथमिक शाळेत त्यांनी सेवा बजावली आहे. शांत स्वभाव, कामातील एकाग्रता, विद्यार्थ्यांशी आपुलकीचा संवाद आणि सातत्याने शैक्षणिक कार्यात व्यस्त राहण्याची वृत्ती ही त्यांच्या व्यक्तिमत्त्वाची वैशिष्ट्ये आहेत.
शिक्षणासोबत संस्कारांचीही शिदोरी
बालवयातील विद्यार्थ्यांना केवळ पुस्तकी शिक्षण न देता त्यांच्यावर योग्य संस्कार घडविणे, हा शेंडकर मॅडम यांच्या कार्याचा विशेष पैलू आहे. त्यांच्या मार्गदर्शनातून अनेक विद्यार्थी घडले असून, आज हे विद्यार्थी विविध क्षेत्रांत चांगल्या पदांवर कार्यरत आहेत. आपल्या जुन्या विद्यार्थ्यांशी असलेले त्यांचे नाते आजही कायम असून, त्यांच्या बॅचमधील अनेक विद्यार्थी आवर्जून शेंडकर मॅडम यांची भेट घेण्यासाठी येत असतात. शिक्षक आणि विद्यार्थी यांच्यातील जिव्हाळ्याचे नाते त्यांच्या कार्याची पावतीच मानली जाते.
सांस्कृतिक कार्यक्रमांतही उल्लेखनीय योगदान
शालेय स्नेहसंमेलन असो किंवा विविध सांस्कृतिक कार्यक्रम, शेंडकर मॅडम विद्यार्थ्यांना प्रशिक्षण देण्यात नेहमीच पुढाकार घेतात. उत्कृष्ट कोरिओग्राफरची भूमिका बजावत त्या विद्यार्थ्यांना नृत्य व सांस्कृतिक कार्यक्रमांचे प्रशिक्षण देतात. त्यामुळे विद्यार्थ्यांच्या कलागुणांना व्यासपीठ मिळवून देण्याबरोबरच त्यांच्यातील आत्मविश्वास वाढविण्याचे कामही त्यांनी केले आहे.
निंबूतच्या शाळेच्या जडणघडणीत मोठे योगदान
केंद्रीय प्राथमिक शाळा निंबूतच्या शैक्षणिक व सांस्कृतिक वाटचालीत सौ. सुवर्णा शेंडकर यांचे मोठे योगदान राहिले आहे. विद्यार्थ्यांच्या सर्वांगीण विकासासाठी सातत्याने प्रयत्न करणाऱ्या शेंडकर मॅडम यांच्या कार्याची दखल घेत पंचायत समिती बारामतीकडून त्यांना गुणवंत शिक्षक पुरस्काराने सन्मानित करण्यात आले आहे.
सौ. सुवर्णा शेंडकर या माजी मंत्री विजयराव कोलते यांच्या भाची असून, सोरटेवाडी गावचे उपसरपंच महेंद्र शेंडकर यांच्या पत्नी आहेत. त्यांच्या या सन्मानाबद्दल निंबूत परिसरातून तसेच शैक्षणिक क्षेत्रातून त्यांच्यावर अभिनंदनाचा वर्षाव होत आहे.
