प्रतिनिधी

 अंधश्रद्धेच्या नावाखाली २९ वर्षीय विवाहित महिलेचा छळ केल्याचा धक्कादायक प्रकार चंदननगर परिसरात उघडकीस आला आहे. पतीला मंगळदोष असल्याचे सांगून तो दूर करण्याच्या नावाखाली महिलेला कथित अघोरी विधी करण्यास भाग पाडल्याचा आरोप तिने पोलिसांत दिलेल्या तक्रारीत केला आहे. या प्रकरणी चंदननगर पोलिसांनी पतीसह सासरच्या पाच जणांविरोधात गुन्हा दाखल केला आहे.

पोलिसांकडे दाखल तक्रारीनुसार, विवाह ठरण्यापूर्वीच सासरच्या मंडळींकडून महिलेच्या कुटुंबीयांकडे १५ लाख रुपयांच्या हुंड्याची मागणी करण्यात आली होती. मुलीचा विवाह व्हावा यासाठी तिच्या वडिलांनी ऑनलाइन पद्धतीने २ लाख २० हजार रुपये दिले. मात्र, उर्वरित रक्कम न दिल्याच्या कारणावरून विवाहानंतर महिलेचा छळ सुरू झाल्याचा आरोप आहे.

दरम्यान, महिलेच्या पतीला मंगळदोष असल्याचे सांगण्यात आले. हा दोष दूर करण्यासाठी भोंदूबाबाच्या सांगण्यावरून महिलेला विविध कथित अघोरी कृत्ये करण्यास भाग पाडण्यात आल्याचे तिने तक्रारीत नमूद केले आहे. यामध्ये अंगारा पाण्यात मिसळून पिण्यास भाग पाडणे तसेच पतीच्या खासगी अवयवाला हळदी-कुंकू लावून पूजा करण्यास सांगितल्याचा गंभीर आरोप करण्यात आला आहे.

गेल्या चार महिन्यांपासून आपला शारीरिक आणि मानसिक छळ सुरू असल्याचे महिलेने पोलिसांना सांगितले. मंगळदोष दूर झाल्याचे सांगून सासरच्या मंडळींनी तिला पुन्हा नांदवून घेण्यास नकार दिल्याचेही तक्रारीत नमूद आहे. मंगळदोष दूर करण्याच्या कारणाखालीच आपल्याशी विवाह करण्यात आल्याचा आरोपही महिलेने केला आहे.

सासरच्या त्रासाला कंटाळून अखेर महिलेने चंदननगर पोलीस ठाण्यात धाव घेत तक्रार दाखल केली. त्यानुसार पतीसह सासरच्या पाच जणांविरोधात गुन्हा नोंदविण्यात आला असून, पोलिसांकडून पुढील तपास सुरू आहे. हुंड्याची मागणी, अंधश्रद्धेच्या नावाखाली करण्यात आलेले कथित विधी आणि महिलेचा झालेला मानसिक व शारीरिक छळ या सर्व बाबींची पोलीस चौकशी करत आहेत.