प्रतिनिधी

पुणे शहर गुन्हे शाखा युनिट ४ च्या पथकाने मोठी कारवाई करत, गेल्या चार वर्षांपासून खूनाच्या व मोक्का (MCOCA) गुन्ह्यात फरार असलेल्या एका पाहिजे आरोपीला बेळगाव (कर्नाटक) येथून शिताफीने जेरबंद केले आहे. मोईनुद्दीन जाकर शेख उर्फ मोईन कालू शेख (वय २८, रा. बन्नेरघट्टा रोड, बोस मिको जवळ, अड्डगोडी, पुखराज लेआउट जवळ, बंगलोर साऊथ, बंगलोर, कर्नाटक) असे अटक करण्यात आलेल्या आरोपीचे नाव आहे.

येरवडा पोलीस ठाण्यात दाखल असलेल्या गुन्ह्यात कलम ३०२, ३८४, ५०६ सह महाराष्ट्र संघटित गुन्हेगारी नियंत्रण कायदा (मोक्का) १९९९ चे कलम ३(१)(२), ३(४) अन्वये गुन्हा दाखल असून, या गुन्ह्यात मोईनुद्दीन शेख हा गेल्या चार वर्षांपासून फरार होता. तो सातत्याने स्वतःचे मोबाईल नंबर बदलत होता.

युनिट ४ चे वरिष्ठ पोलीस निरीक्षक कांचन जाधव यांच्या मार्गदर्शनाखाली पोलीस उपनिरीक्षक दिग्विजय चौगले व त्यांचे पथक या गुन्ह्याचा समांतर तपास करत होते. तपासादरम्यान पोलीस अंमलदार अमजद शेख व अनिकेत भोसले यांना मिळालेल्या गोपनीय खबऱ्यावरून आरोपी हा कर्नाटक राज्यात असून, तो गांजा सेवन व विक्रीच्या धंद्यात सक्रिय असल्याची माहिती मिळाली. तांत्रिक विश्लेषणाच्या आधारे आरोपी ठाणगुडी (कर्नाटक) व बंगलोर परिसरात असल्याची माहिती निष्पन्न झाली.

​त्यानुसार, दिनांक ११/०१/२०२६ रोजी पोउपनि दिग्विजय चौगले यांचे पथक खाजगी वाहनाने बंगलोर येथे रवाना झाले. आरोपीची वेशभूषा करून (अमजद – चहा विक्रेता, राजपुत-मेकॅनिक) पाळत ठेवली असता, तो बेंगलोरहून बेळगावडे निघाल्याचे समजले. सार्वजनिक वाहतुकीत असल्याने चालू वाहनात कारवाई करणे अशक्य असल्याने पोलिसांनी त्याचा पाठलाग केला. अखेर बेळगावमधील माळमारुती पोलीस स्टेशन हद्दीत सापळा रचून ‘चिल्ड्रेन गार्डन’ बेळगाव येथून आरोपीला ताब्यात घेण्यात आले.

आरोपीकडे विचारपूस केली असता त्याने वरील गुन्ह्यामध्ये सहभाग असल्याचे कबूल केले. त्याच्याविरुद्ध येरवडा पोलीस ठाण्यात पुढील कायदेशीर कारवाईसाठी त्याला ताब्यात देण्यात आले असून, गुन्हे शाखेच्या पथकाने केलेल्या या कामगिरीचे वरिष्ठ अधिकाऱ्यांकडून कौतुक होत आहे.