नसरापूर येथे चिमुकलीवर झालेल्या अत्याचाराचा बारामती मध्ये तीव्र निषेध

प्रतिनिधी

पुणे जिल्ह्यातील भोर तालुक्यातील नसरापूर येथे चार वर्षांच्या चिमुकलीवर झालेला अत्याचार आणि तिची निर्घृण हत्या या हृदयद्रावक घटनेच्या निषेधार्थ बारामती शहरात तीव्र संताप व्यक्त करण्यात आला. अखिल भारतीय विद्यार्थी परिषद (अभाविप) बारामती शाखेच्या वतीने भिगवण चौक येथे जोरदार निषेध आंदोलन करत दोषींना कठोर शिक्षा देण्याची मागणी करण्यात आली.

या घटनेने संपूर्ण समाजमन हेलावून गेले असून नागरिकांमध्ये प्रचंड संतापाची लाट उसळली आहे. “पीडितेला न्याय मिळालाच पाहिजे” आणि “दोषींना तात्काळ फाशी द्या” अशा घोषणा देत कार्यकर्त्यांनी परिसर दणाणून सोडला. आंदोलनादरम्यान आरोपीविरोधात तीव्र रोष व्यक्त करत प्रशासनाने तातडीने कठोर पावले उचलावीत, अशी मागणी करण्यात आली.

यावेळी अभाविपच्या पदाधिकाऱ्यांनी सांगितले की, अशा अमानवी आणि संतापजनक घटनांमुळे समाजातील सुरक्षिततेवर प्रश्नचिन्ह निर्माण होत आहे. महिलांवर आणि बालकांवर वाढणारे अत्याचार रोखण्यासाठी शासनाने ठोस आणि कडक उपाययोजना राबविणे अत्यावश्यक आहे. संबंधित प्रकरणाची जलदगतीने चौकशी करून दोषीला कठोरात कठोर शिक्षा देण्यात यावी, अन्यथा अभाविपतर्फे आणखी तीव्र आंदोलन उभारले जाईल, असा इशाराही देण्यात आला.

या आंदोलनात प्रदेश सहमंत्री श्रावणी बाचल, जिल्हा सहसयोजक ओंकार तावरे, शहर सहमंत्री तन्मयी कोंढाळकर, शहर संपर्क प्रमुख पारस हवलदार, शहर कार्यकारणी सदस्य आदित्य गुरसुळकर, टीसी कॉलेज संपर्क प्रमुख ओम परकाळे, जयदीप सपकळ, धनराज बागल, तेजस डेरे, निखिल जाधव, प्रतीक पाटील, श्रुती त्यारे, किरण साळवे, दिक्षा लोंढे, सिमरन मुलाणी, रोहित नरुटे, ओम काटे, तन्मय काजळे, शुभम शेंडे, वैभव शेंडे, सिद्धार्थ रासकर, प्रथमेश गायकवाड आदी कार्यकर्ते मोठ्या संख्येने सहभागी झाले होते.

नसरापूर येथील चिमुकली हत्याप्रकरणी न्यायाच्या मागणीसाठी भिगवण चौक, बारामती येथे अभाविपतर्फे करण्यात आलेले तीव्र निषेध आंदोलन.