प्रतिनिधी
महाराष्ट्र शासनाच्या महसूल विभागामार्फत बारामती विधानसभा मतदारसंघात ‘छत्रपती शिवाजी महाराज महाराजस्व समाधान शिबिर’ आयोजित करण्यात आले आहे. हे शिबिर रविवार, दि. २ ऑगस्ट २०२६ रोजी सकाळी १०.०० वाजता श्री सोमेश्वर शिक्षण प्रसारक मंडळाचे, श्री शरदचंद्र पवार कॉलेज ऑफ इंजिनिअरिंग अँड टेक्नॉलॉजी, सोमेश्वरनगर (ता. बारामती, जि. पुणे) येथे होणार आहे.
या शिबिरामध्ये महसूल, कृषी, आरोग्य, पुरवठा, ग्रामविकास, परिवहन (एस.टी.), पशुसंवर्धन, वन, महिला व बालकल्याण, महावितरण, आरटीओ, पोस्ट, भूमी अभिलेख तसेच विविध शासकीय विभागांच्या योजना व सेवा नागरिकांना एकाच ठिकाणी उपलब्ध करून दिल्या जाणार आहेत.
शिबिरात महसूल विभागाशी संबंधित विविध दाखले, आधार कार्ड दुरुस्ती सेवा, एसटी महामंडळाचे NCMC कार्ड, मोफत आरोग्य तपासणी, रक्तदान शिबिर, कर्जमाफीसंदर्भातील प्रमाणीकरण, ई-पीक पाहणी अर्ज, विविध शासकीय योजनांचे अर्ज स्वीकारणे व लाभार्थींना मार्गदर्शन आदी सेवा दिल्या जाणार आहेत. तसेच महिला, शेतकरी, विद्यार्थी आणि सर्वसामान्य नागरिकांच्या दैनंदिन अडचणींचे तातडीने निराकरण करण्यावर भर दिला जाणार आहे.
या शिबिरासाठी मा. उपमुख्यमंत्री सुनेत्रावहिनी पवार यांची प्रमुख उपस्थिती लाभणार असून, उपविभागीय अधिकारी उत्तम दिघे आणि तहसीलदार स्वप्नील रावडे यांच्या मार्गदर्शनाखाली तहसील कार्यालय, बारामती यांच्या वतीने आयोजन करण्यात आले आहे.
बारामती तालुक्यातील सर्व ग्रामस्थांनी या शिबिराचा लाभ घ्यावा, असे आवाहन तहसील कार्यालय, बारामती यांच्या वतीने करण्यात आले आहे.
By
