प्रतिनिधी – फिरोज भालदार

बारामती तालुक्यात गणरायाच्या स्वागतासाठी गावागावांतील गणेश मंडळांची लगबग सुरू झाली आहे. आगमनाला एक दिवस शिल्लक असतानाच मंडप उभारणी, गणेशमूर्ती बसविण्यासाठी शेडची तयारी, आकर्षक सजावट आणि विद्युत रोषणाईच्या कामांना वेग आला आहे.

गणेशोत्सवाच्या अनुषंगाने मंडळांचे कार्यकर्ते विविध कामांमध्ये व्यस्त झाले आहेत. कुठे मंडपाचे काम अंतिम टप्प्यात आले आहे तर कुठे आकर्षक देखावे आणि सजावटीची तयारी सुरू आहे. गणरायाच्या आगमनापासून विसर्जनापर्यंतचा उत्सव भक्तिमय वातावरणात साजरा करण्यासाठी विविध धार्मिक, सामाजिक आणि सांस्कृतिक कार्यक्रमांचे नियोजनही करण्यात येत असल्याचे चित्र बारामती तालुक्यात दिसत आहे .

विशेष म्हणजे गणेशोत्सवाच्या तयारीत केवळ मंडळांचे कार्यकर्तेच नाहीतर नागरिकांचाही उत्स्फूर्त सहभाग पाहायला मिळत आहे. लहान मुलांपासून ज्येष्ठ नागरिकांपर्यंत सर्वजण आपल्याला जमेल असे उत्सवाच्या तयारीत सहभागी होत आहेत. त्यामुळे गणेशोत्सव हा भक्तीबरोबरच सामाजिक एकोपा, बंधुभाव आणि सामूहिक सहभागाचा सोहळा ठरत आहे.

गावागावांतील मंडप सजू लागले असून गणेशमूर्तींच्या आगमनाची तयारी अंतिम टप्प्याकडे आली आहे. त्यामुळे काही तासातच ‘गणपती बाप्पा मोरया’च्या जयघोषाने बारामती तालुक्यातील वातावरण भक्तिमय होणार. बारामती शहरा बरोबरच बारामती तालुक्यातील खेडेगावात देखील गणेशोत्सवाच्या आगमनाची उत्सुकता नागरिकांमध्ये निर्माण झाली आहे.