प्रतिनिधी
शहरातील सूर्यनगरी परिसरात प्रेमसंबंधाच्या तणावातून १९ वर्षीय तरुणाने स्वतःवर गोळी झाडून जीवन संपविल्याची घटना घडली. अविष्कार अमोल ढोले (वय १९, मूळ रा. कुरवली, पंढरपूर) असे मृत तरुणाचे नाव आहे.
पोलिसांच्या प्राथमिक माहितीनुसार, अविष्कार बारामतीत शिक्षणासाठी राहत होता. त्याचे एका विवाहित महिलेसोबत प्रेमसंबंध होते. या संबंधांची माहिती महिलेच्या पतीला मिळाल्यानंतर अविष्कार मानसिक तणावात असल्याची माहिती तपासात समोर आली आहे.
शनिवारी दुपारी साडेतीन ते पावणेचारच्या सुमारास सूर्यनगरी येथील जयश्री अपार्टमेंटमधील राहत्या खोलीत अविष्कारने स्वतःकडील पिस्तुलातून डोक्यात गोळी झाडली. गंभीर जखमी अवस्थेत त्याला प्रथम बारामतीतील पुण्यश्लोक अहिल्यादेवी होळकर शासकीय रुग्णालयात दाखल करण्यात आले. प्रकृती चिंताजनक असल्याने पुढील उपचारासाठी पुण्यातील ससून रुग्णालयात हलविण्यात आले. मात्र, उपचारादरम्यान रविवारी सकाळी त्याचा मृत्यू झाला.
या प्रकरणी बारामती तालुका पोलिस ठाण्यात अकस्मात मृत्यूची नोंद करण्यात आली आहे. घटनेत वापरलेले पिस्तुल अविष्कारकडे कुठून आले, त्याच्याकडे ते कसे पोहोचले, तसेच या घटनेमागे अन्य कोणते कारण आहे का, याचा तपास पोलिसांकडून सुरू आहे. पोलिस उपनिरीक्षक अमोल कदम पुढील तपास करीत आहेत.
