संत रोहिदास चर्मोद्योग व चर्मकार विकास महामंडळाच्या योजनांचा लाभ घेण्याचे आवाहन

प्रतिनिधी

संत रोहिदास चर्मोद्योग व चर्मकार विकास महामंडळामार्फत राबविण्यात येणाऱ्या राज्य शासन व केंद्र शासनाच्या राष्ट्रीय अनुसूचित जाती वित्त आणि विकास महामंडळाकडील (एन.एस.एफ.डी.सी.) विविध योजनांचा अनुसूचित जातीतील चर्मकार समाजातील इच्छुकांना लाभ घेण्याचे आवाहन करण्यात येत आहे.

अनुसूचित जातीतील चर्मकार समाजातील (चांभार, ढोर, होलार, मोची आदी) नागरिकांच्या आर्थिक, शैक्षणिक व सामाजिक विकासासाठी विविध कर्ज योजना राबविण्यात येतात. सन २०२३-२४ या आर्थिक वर्षाकरिता ४ हजार ८०० लाभार्थ्यांना कर्ज वाटपाचे उद्दिष्ट देण्यात आले आहे.

एन.एस.एफ.डी.सी. नवी दिल्ली यांच्या मुदती कर्ज योजनेअंतर्गत लघु उद्योगासाठी १ लाख रुपये, १ लाख ५० हजार रुपये, आणि २ लाख रुपये, चर्मोद्योगासाठी २ लाख रुपये, लघुऋण वित्त योजना व महिला समृद्धी योजना प्रत्येकी ५० हजार रुपये या योजनांसाठी मागील प्रलंबित प्रकरणाकरीता २२ कोटी २१ लाख रुपये इतका निधी प्राप्त झालेला आहे.

२०२३-२४ या आर्थिक वर्षात एन.एस.एफ.डी.सी. यांच्या मुदती कर्ज योजने अंतर्गत लघु उद्योगासाठी ५ लाख रुपये, लघुऋण वित्त योजना व महिला समृद्धी योजना प्रत्येकी १ लाख ४० हजार रुपये तसेच नवीन महिला अधिकारिता योजनेकरीता ५ लाख रुपये या योजना मंजूर झाल्या आहेत.

शैक्षणिक कर्ज योजनेमध्ये वाढ झाली असून भारतामध्ये शिक्षणासाठी २० लाख रुपये व विदेशामध्ये ३० लाख रुपयांपर्यंत कर्ज मंजूर करण्यात येणार आहे. अधिक माहितीसाठी नजीकच्या महामंडळाच्या जिल्हा कार्यालयास भेट द्यावी, असे संत रोहिदास चर्मोद्योग व चर्मकार विकास महामंडळाचे व्यवस्थापकीय संचालक धम्मज्योती गजभिये यांनी कळविले आहे.