प्रतिनिधी
कातवी (ता. मावळ) – बेकायदेशीर पिस्तुल असल्याची माहिती पोलिसांना दिल्याच्या कारणावरून एका व्यक्तीस रागाच्या भरात लाकडी दांडक्याने आणि दगडाने मारहाण करण्यात आली. ही घटना मावळ तालुक्यातील कातवी गावात नुकतीच घडली.
जखमी व्यक्तीचे नाव अशोक रघुनाथ चव्हाण (वय ४९, रा. कातवी) असे असून, त्यांनी तळेगाव एमआयडीसी पोलीस ठाण्यात दिलेल्या तक्रारीवरून एका संशयित इसमाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अशोक चव्हाण यांनी काही दिवसांपूर्वी एका व्यक्तीकडे बेकायदेशीर पिस्तुल असल्याची माहिती पोलिसांना दिली होती. यामुळे संतप्त झालेल्या आरोपीने चव्हाण यांच्यावर सोमवार दिनांक २३ जून रोजी सायंकाळी साडेसहा वाजण्याच्या सुमारास अचानक हल्ला चढवला.
लाकडी दांडक्याने व दगडाने झालेल्या मारहाणीत चव्हाण यांच्या डोक्याला व हाताला गंभीर इजा झाली आहे. त्यांना तातडीने तळेगाव येथील खासगी रुग्णालयात दाखल करण्यात आले असून, सध्या त्यांच्यावर उपचार सुरू आहेत.
या प्रकरणी आरोपीविरोधात भारतीय दंड विधान कलम ३२३, ३२४, ५०४, ५०६ आणि आयुध कायद्यानुसार गुन्हा दाखल करण्यात आला आहे. तळेगाव एमआयडीसी पोलीस अधिक तपास करीत आहेत. पोलिसांनी परिसरात गस्त वाढवून सुरक्षा उपाययोजना कडक केल्या आहेत.
या घटनेमुळे कातवी परिसरात तणावाचे वातावरण पसरले आहे. गुन्हेगारीविरोधात माहिती दिल्यावर सुरक्षेची हमी मिळाली पाहिजे, अशी मागणी स्थानिक नागरिकांकडून करण्यात येत आहे.
