विद्यार्थांनी योग्य संगत निवडावी – सपोनि. मनोजकुमार नवसरे

सोमेश्वरनगर ( वा )
विद्यार्थीदशेत असताना नेहमी चांगली संगत निवडावी. चुकीची संगत आयुष्य बरबाद करू शकते. अमली पदार्थाच्या सेवनाने गंभीर गुन्हे घडतात त्यामुळे त्यापासून दूर रहा असे आवाहन सुपे पोलिस ठाण्याचे सहाय्यक पोलीस निरीक्षक मनोजकुमार नवसरे यांनी केले.
सोमेश्वर शिक्षण प्रसारक मंडळाच्या सोमेश्वर विद्यालय आंबी बुद्रुक येथे अमली पदार्थ विरोधी जनजागृती अभियाना अंतर्गत सहाय्यक पोलीस निरीक्षक मनोजकुमार नवसरे यांनी विद्यार्थ्यांशी संवाद साधला. यावेळी ते म्हणाले की सुरुवातीच्या काळात केवळ मजा म्हणून केलेले व्यसन नंतरच्या काळात उग्र स्वरूप धारण करते. ग्रामीण भागातील विद्यार्थ्यांत प्रचंड ऊर्जा असते त्यामुळे या ऊर्जेचा सकारात्मक वापर करायला हवा. अमली पदार्थांच्या सेवनाने गंभीर अपघात होतात. अल्पवयीन मुलांचे गुन्हेगारीतील वाढते प्रमाण चिंताजनक आहे. रिल व रिअल आयुष्य वेगळी असून विद्यार्थ्यांनी आभासी दुनियेत जगू नये. असे आवाहन त्यांनी केले
सायबर जनजागृती यावर बोलताना ते म्हणाले की या वयात विद्यार्थ्यांनी मोबाईलचा योग्य वापर करावा. सर्व सोशल मीडिया साईट पासून दूर राहावे. अनोळखी व्हिडिओ कॉल उचलू नये. एपीके फाईल्स डाऊनलोड करू नये. ओटीपी कुणालाही सांगू नये. डिजिटल अवेअरनेस बाबत विद्यार्थ्यांनी आपल्या पालकांना माहिती द्यावी.
वाहतुकीच्या नियमाबाबत बोलताना मनोजकुमार नवसरे म्हणाले की अल्पवयीन मुलांनी दुचाकी चालवल्यास पालकांवर गुन्हा दाखल होणार आहे. त्यांच्याकडून मोठा दंड वसूल होणार आहे. त्यामुळे विद्यार्थ्यांनी वाहने चालवू नयेत.
मुलींना कुणीही त्रास देत असेल तर त्यांनी याबाबतची माहिती आपले पालक किंवा शिक्षकांना सांगावी. कुणी चुकीच्या ठिकाणी स्पर्श करत असेल तर त्याचा विरोध करून त्याची माहिती आपल्या पालकांना द्यावी.
यावेळी शाळा व्यवस्थापन समितीचे अध्यक्ष संदीप गार्डी, आंबी बुद्रुक च्या सरपंच शितल जगताप, विद्यालयाचे मुख्याध्यापक विजयकुमार शिंदे, पोलीस कर्मचारी तुषार जैनक, सोमनाथ होले व निहाल वणवे, सारीका जाधव उपस्थित होते. कार्यक्रमाचे प्रास्ताविक विद्यालयातील शिक्षक हेमंत गडकरी यांनी केले. सूत्रसंचालन संतोष जेधे यांनी केले.
……………
चौकट – ड्रेस नको, हेल्मेट घ्या.
रस्ते अपघाताच्यावेळी दुचाकीस्वारांच्या डोक्यावर हेल्मेट असेल तर गंभीर दुखापतीची शक्यता कमी होते. त्यामुळे विद्यार्थ्यांनी आपल्या पालकांना आम्हाला नवीन ड्रेस नको तर तुम्हाला हेल्मेट विकत घ्या असे आवाहन करायला हवे असे आवाहन मनोजकुमार नवसरे यांनी विद्यार्थ्यांना केले.