प्रतिनिधी
सोलापुरात संत गजानन महाराज आणि सद्गुरू प्रभाकर स्वामी महाराज यांच्या पालखी भेटीचा सोहळा भक्तिमय वातावरणात संपन्न झाला. सम्राट चौकातील सद्गुरू प्रभाकर महाराज मंदिरात रंगलेल्या संतभेटीच्या सोहळ्याला हजारो वारकऱयांसह भाविक उपस्थित होते.
गजानन महाराजांची पालखी दोन दिवस सोलापूर मुक्कामी असून, तीर्थक्षेत्र सोलापूर हे विठुनामाच्या गजराने दुमदुमले आहे.
शेगावच्या गजानन महाराजांच्या पालखीने 500 कि.मी.चा प्रवास करत शुक्रवारी सोलापूर जिह्यात आगमन केले होते. आज सोलापूर शहरात भक्तिमय वातावरणात पाणी गिरणीजवळ पालखीचे आगमन झाले. महापौर विनायक कोंडय़ाल, धनश्री कोंडय़ाल, उपमहापौर ज्ञानेश्वरी देवकर, आयुक्त सचिन ओम्बासे, पोलीस आयुक्त एम. राजकुमार यांच्यासह पदाधिकारी व अधिकाऱयांनी पालखीचे स्वागत केले. त्यानंतर पालखी मार्गावरून गजानन महाराजांच्या पालखीचे सम्राट चौकातील सद्गुरू प्रभाकर स्वामी महाराज मंदिरात आगमन झाले.
परंपरेप्रमाणे ‘गण गण गणात बोते’चा जयघोष टाळ-मृदुंगाच्या गजरात मंदिरामध्ये गजानन महाराजांची पालखी आणि सदगुरू प्रभाकर स्वामी महाराज पालखींचा अनुपम भेटीचा सोहळा संपन्न झाला. यावेळी हजारो भाविकांनी केलेल्या जयघोषाने वातावरण दुमदुमून गेले होते. भेटी सोहळ्यानंतर आरती करण्यात आली व वारकरी व भक्तांना महाप्रसादाचे वाटप करण्यात आले. या पालखी सोहळ्यात 700 वारकरी गेल्या 22 दिवसांपासून पायी चालत आहेत.
सायंकाळी कुचन प्रशालेत पालखीचा मुक्काम होता, तर रविवारी सातरस्ता परिसरातील उपलप मंगल कार्यालयात मुक्काम राहणार असून, सोमवारी सकाळी पालखीचे पंढरपूरकडे प्रस्थान होणार आहे. पालखी भेट सोहळय़ानिमित्त शहरात विविध ठिकाणी प्रसादाचे वाटप करण्यात आले.
By
